Ռուսաստանի լեռնային հրեաների համայնքի ակտիվ ներկայացուցիչներից մեկը, արվեստի գործիչ, բանաստեղծ ու հրապարակախոս, «Գայանե Խաչատուրյան» միջազգային հիմնադրամի նախագահ Վալերի Խանուկաևը վստահ է, որ Իսրայելը շուտով կճանաչի Հայոց ցեղասպանությունը: Ըստ Խանուկաևի, Իսրայելը չի կարող հաշվի չառնել աշխարհի հրեական համայնքների դրական վերաբերմունքը Հայաստանի ու Արցախի հանդեպ:
«Հրեա մտավորականությունը միշտ սատարել է Հայկական հարցին: Հայոց ցեղասպանության թեման լայնորեն քննարկվել է հրեաների շրջանում: Ավելին, դեռ ղարաբաղյան շարժման սկզբում ղարաբաղցիների ռուսաստանցի պաշտպանների թվում կային նաև հրեաներ: Իսկ Իսրայելը ոչ միայն կճանաչի Հայոց ցեղասպանությունը, այլ նաև սերտ կապեր կհաստատի Հայաստանի ու հայկական սփյուռքի հետ: Այլ ճանապարհ չկա: Քարերը հավաքելու ժամանկն է»,-նշում է «Գայանե Խաչատուրյան» հիմնադրամի նախագահը՝ ներկայացնելով իր նոր «Քարը» հրապարակումը, հայտնում է Ռուսաստանի հայերի միությունը: