Բացի Արմեն Ջիգարխանյանից և Վիկ Դարչինյանից այս տարի խորովածի փառատոնին կմասնակցեն նաև հայ և վրացի լեգենդար ֆուտբոլիստները, ծանրամարտիկներ։ Փառատոնին իր մասնակցությունը հաստատել է Խորեն Հովհաննիսյանը։ Այսօր լրագրողների հետ հանդիպմանն այս մասին ասաց «Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը։ Նա նշեց, որ ֆուտբոլիստները կունենան հատուկ հարթակ և այս անգամ կմրցեն խորոված պատրաստելու մեջ։
Ինչ վերաբերում է Արմեն Ջիգարխանյանի մասնակցությանը, Մամուլյանը նշեց, որ նա շատ անկանխատեսելի է և կարող է վերջին վայրկյանին մտափոխվել։ Սակայն այսօրվա դրությամբ Ջիգարխանյանը հաստատել է իր մասնակցությունը։ Այս տարի փառատոնը կանցկացվի «Երբ գալիս է սեպտեմբերը» խորագրի ներքո, և նախատեսվում է Արմեն Ջիգարխանյանի բրոնզաձույլ արձանի բացումը` խորոված անելիս:
Փառատոնին կմասնակցեն նաև «Կարին», «Սասուն» ազգագրական խմբերը և հայկական էստրադայի երգիչներ։
