Վրացական իշխանությունները նոր ուսումնական տարվան ընդառաջ շարունակում են ոտնահարել Սամցխե-Ջավախքի հայ փոքրամասնության իրավունքները: Այդ ուղղությամբ վերջին ակցիան ուսուցիչների ապօրինի և զանգվածային հեռացումներն են դպրոցներից:
«Այս դեպքում համեմատաբար երիտասարդների հետ միասին ծիծաղելի պատճառաբանություններով հեռացվում են նաև վաստակավոր և բազմամյա մանկավարժներ, որոնց տեղերը մեկընդմիշտ բաց են մնում հայրենի դպրոցներում»,- այս առիթով գրում է Սամցխե-Ջավախքի և Քվեմո Քարթլիի հայկական հասարակական կազմակերպությունների խորհուրդը:
Խորհրդի կարծիքով, կրճատված ուսուցիչների աշխատավարձերի հաշվին մասամբ բարձրացնելով մնացյալների աշխատավճարը` վրացական իշխանությունները փորձում են թոզ փչել Եվրոպական կառույցների աչքին և դրանով իսկ «համապատասխանեցվել» եվրոպական կրթական ստանդարտներին:
