Ռուսաստանի նախագահ Դմիտրի Մեդվեդևը շնորհավորական նամակ է հղել Հայաստանի նախագահ Սերժ Սարգսյանին Հայաստանի անկախության 20-ամյակի կապակցությամբ:
«Սրտանց շնորհավորում եմ Ձեզ և բարեկամ հայ ժողովրդին Հայաստանի Հանրապետության անկախության հռչակման 20-ամյակի առթիվ: Գոհունակությամբ ենք նշում, որ նոր հիմքի վրա է ամրապնդվել Հայաստանի և Ռուսաստանի պատմական խոր արմատներ ունեցող, ավանդական բարիդրացիական հարաբերությունները»,- գրում է նախագահը:
Մեդվեդևն ընդգծել է, որ երկու երկրները համատեղ ջանքերով բացում են փոխգործակցության նոր հեռանկարային ուղղություններ առևտրատնտեսական, ներդրումային, հումանիտար և այլ ոլորտներում` հույս հայտնելով, որ այս տարվա հոկտեմբերին սպասվող Սերժ Սարգսյանի այցը Մոսկվա լուրջ խթան կհաղորդի համագործակցության հետագա բազմակողմանի զարգացմանը:
Վերջում Մեդվեդևը նշել է ԱՊՀ տարածքում ինտեգրացիոն կառույցների շրջանակներում համակարգված աշխատանքը Հայաստանի և Ռուսաստանի ժողովուրդների երկարաժամկետ շահերին համապատասխան, որոնք «կարևոր դեր են խաղում երկկողմ հարաբերությունների ողջ համալիրի դինամիկ զարգացման, Անդրկովկասում անվտանգության և կայունության ամրապնդման գործում»:
