Արցախի Հանրապետության նախագահ Բակո Սահակյանն այսօր այցելել է Հայ-ռուսական (սլավոնական) համալսարան և մասնակցել բուհի գիտական խորհրդի ընդլայնված նիստին՝ նվիրված ԼՂՀ հռչակման 20-ամյակին:
Նախագահականից հայտնում են, որ համալսարանի ռեկտոր Արմեն Դարբինյանը Նախագահ Սահակյանին է հանձնել Հայ-ռուսական (սլավոնական) համալսարանի պատվո շքանշանը և պատվավոր դոկտորի վկայականը: Բակո Սահակյանը երախտագիտություն է հայտնել նման գնահատանքի համար:
Իր խոսքում Նախագահն անդրադարձել է մեր երկրի ներքին և արտաքին քաղաքականությանը, ներհայկական փոխգործակցությանը, ադրբեջանա-ղարաբաղյան հակամարտության կարգավորման ներկա փուլին և հեռանկարներին: Երկրի ղեկավարը կարևորել է նաև Արցախի բուհերի և Հայ-ռուսական (սլավոնական) համալսարանի միջև կապերի խորացման ու ընդլայնման անհրաժեշտությունը:
Հանդիպման վերջում Բակո Սահակյանը պատասխանել է համալսարանի պրոֆեսորադասախոսական կազմի և ուսանողության կողմից բարձրացված հարցերին: