Հայաստանը պատրաստվում է սպառազինության միջազգային շուկայում վաճառել իր անօդաչու ինքնաթիռներն ու ՌԱՀ այլ արտադրանք, ՌԻԱ Նովոստիին տված հարցազրույցում հաղորդել է Հայաստանի պաշտպանության նախարարի առաջին տեղակալ Դավիթ Տոնոյանը: Նա նշել է, որ արդեն մի քանի հայկական գիտահետազոտական ինստիտուտներն ու պաշտպանական ձեռնարկությունները տարբեր տեսակի անօդաչու ինքնաթիռներ են մշակում, որոնց շարքում ամենից առաջ պետք է առանձնացնել «Կռունկ-25» մոդելը: «Բոլոր անօդաչու ինքնաթիռները հաջողությամբ օգտագործվում են հետախուզության և լրահավաքի համար, և մենք գտնում ենք, որ մեր մշակումները միանգամայն մրցունակ կլինեն միջազգային շուկայում»,- ընդգծել է Տոնոյանը:
Տոնոյանը մեկնաբանել է նաև, թե ինչպես է Հայաստանն իր սահմանափակ ռեսուրսներով այդքան արագ յուրացրել ռազմական տեխնիկայի այդ հեռանկարային տեսակի արտադրությունը: «Պարզապես ժամանակին վերանայվեց կադրային քաղաքականությունը, և մասնագետները կարողացան ճիշտ կազմակերպել իրենց գործը: Եվ հետո կյանքը ստիպեց: Մեզ սահմանին չափազանց անհրաժեշտ է այդ տեխնիկան, չէ որ մենք արբանյակային խմբավորումներ չունենք»,- նշել է նա:
Ինչ վերաբերում է հայկական ՌԱՀ հնարավորություններին, ապա, Տոնոյանի խոսքով, 1990-ական թվականներին Հայաստանում արտադրական հզորություններ ստեղծեցին, որոնք ընդունակ էին բավարարել զինված ուժերի զինամթերքի` հրաձգային զենքի և հրետանային համակարգի որոշ տեսակների պահանջարկը: «Այժմ մենք մի շարք մշակումներ ունենք ռազմական տեխնոլոգիաների բնագավառում սեփական կարիքների համար, որոնց մեծամասնությունը շարքային արտադրության ցուցակում է: Որոշ բաներ մենք մտադիր ենք ներկայացնել շուկայում: Օրինակ, Ս-125 և ՕՍԱ-ԱԿ ՀՕՊ զենիթահրթիռային համալիրների ռադիոտեխնիկական համալիրներում օգտագործելու համար բարձր հաճախականության լայնաշերտ հզորացուցիչներ, ՌՏՀ և ՀՕՊ համալիրների համար շարժվող թիրախների սելեկցիայի համակարգեր և այլն»,- հաղորդել է նա:
Տոնոյանը նշել է նաև, որ խորհրդային տարիներին Հայաստանում ռազմական նշանակության վերջնական արտադրանք չէր թողարկվում: Սակայն պաշտպանական ձեռնարկությունները շատ էին, և որոշ տվյալների համաձայն, հայկական ձեռնարկություններն արտադրում էին ռազմական էլեկտրոնիկայի համամիութենական արտադրության ողջ ծավալի մինչև 40 տոկոսը:
