Խաղերի նախագծմամբ զբաղվող Kidostate ընկերությունը ստեղծել է կրթական ծրագիր 3-5 տարեկան երեխաների համար։ Ծրագիրը կոչվում է iBuben։ Ծրագրի միջոցով երեխաները մեկ շաբաթում կարող են սովորել ողջ հայերեն այբուբենը և թվերը։ Ծրագիրը լի է գունավոր նկարներով և պատկերներով։
Նախագծի կառավարիչ Ալբերտ Պողոսյանը PanARMENIAN.Net-ի թղթակցի հետ զրույցում նշեց, որ մեկ շաբաթը երաշխավորված է, քանի որ նախապես կատարել են փորձարկումներ 3-5 տարեկան երեխաների շրջանում։
«Ծրագրում առկա բոլոր նկարների հեղինակն է անիմատոր Ագաթա Բադալյանը։ Մենք ուրախ ենք ներկայացնել այս փոքր ծրագիրը երեխաներին, այն շատ զվարճալի է»,-նշեց Ալբերտ Պողոսյանը։
iBuben ծրագիրը ունի և՛ iOS և՛ Android տարբերակներ։ Այս պահին հասանելի է միայն Android 1,6 և ավելի բարձր տարբերակների համար։ iBuben-ը կարելի է ներբեռնել անվճար Android Market-ից։
Ալբերտ Պողոսյանի խոսքով, մի երկու օր է, ինչ ծրագիրը տեղադրված է Android Market-ում և արդեն հասցրել է ներբեռնվել 100 անգամ։
Ալբերտ Պողոսյանի խոսքով, Kidostate ընկերությունը շատ շուտով կհայտնի նաև իր հաջորդ նմանատիպ կրթական նախագծի մասին, որի վրա այժմ աշխատում են նախագծողները։