Հոկտեմբերի 5-ին «Նարեկացի» արվեստի միության ցուցահանդեսների աշնանային շրջանը մեկնարկելու է գեղանկարիչներ Սևան Նագգաշյանի, Արմեն Խոջոյանի, Տիգրան Ասատրյանի, Հովնան Սարգսյանի և Գևորգ Սարգսյանի խմբակային ցուցահանդեսի բացմամբ:
Ցուցահանդեսում ներկայացվելու են ֆիգուրատիվ գեղանկարներ, կոմպոզիցիաներ, դիմանկարներ ու բնապատկերներ: «Այս խումբն արդեն քանի տարի է կա, ու պարբերաբար ցուցարվում է միասին` երբեմն նոր արվեստագետներ գտնելով, համալրվելով», - բնորոշում է մասնակից Սևան Նագգաշյանը` հավելելով, որ խմբի կորիզը եղել են Արմենը, Տիգրանը և նա, ապա միացել է Հովնանը, այնուհետև` Գևորգ Սարգսյանը (Ճալան):
Նկարիչները հիմնականում աշխատում են յուղաներկով և ակրիլով: Գևորգ Սարգսյանը` Ճալան, ներկայանալու է խառը տեխնիկայով արված աշխատանքներով, իսկ Սևան Նագգաշյանը` օֆորտի կիրառմաբ:
Արվեստագետները խուսափում են իրենց աշխատանքը անվանել արվեստաբանական ինչ-որ «ույթ»-երի և «իզմ»-երի հոլովույթում, ու արվեստագետի իրենց կեցվածքը փորձում են արտահայտել կյանքի ու բնության հետ փոխհարաբերության տիրությում: Ներկայացվող հինգ արվեստագետներն էլ բազմիցս արժանացել են հայ ու արտասահմանցի հանդիսատեսի, արվեստագետների, արվեստի քննադատների ու հեղինակավոր ժյուրիների բարձր գնահատանքին ու մրցանակներին: Անհատական ու խմբակային ցուցահանդեսներով հանդես են եկել Հայաստանի ու արտերկրի բազմաթիվ ցուցասրահներում, անդամակցում են մասնագիտական տարբեր միությունների ու ընկերությունների:
Ցուցահանդեսը շարունակվելու է մինչև հոկտեմբերի 9-ը:
