28 ապրիլի 2003 - 22:33 AMT
ԵՎՐԱԶՏԸ-Ի ԳԼԽԱՎՈՐ ՔԱՐՏՈՒՂԱՐԸ ՄՏԱԴԻՐ Է ՄՈՏ ԺԱՄԱՆԱԿՆԵՐՍ ԱՅՑԵԼԵԼ ՀԱՅԱՍՏԱՆ
ԵվրԱզՏԸ-ի գլխավոր քարտուղար Գրիգորի Ռապոտան ծրագրում է մոտ ժամանակներս այցելել Հայաստան: Այդ մասին, ինչպես հաղորդում է «Արմինֆո» գործակալությունը, Դուշանբեյում հայ լրագրողներին է հաղորդել ինքը` Գ.Ռապոտան: Նրա խոսքերով, Երեւանում նախատեսվում է քննարկել Հայաստանի եւ ԵվրԱզՏԸ-ի միջեւ դիրքորոշումների մերձեցման հարցերը: Գ.Ռապոտան նշել է, որ այժմ, երբ Հայաստանին ԵվրԱզՏԸ-ի դիտորդի կարգավիճակ է տրամադրվել, արդեն հնարավոր է փոխգործակցություն տնտեսության որոշակի ոլորտներում: Մասնավորապես, նա նշել է Հայաստանի հիդրոէներգետիկ պաշարների յուրացման բնագավառը: Հիշեցնենք, որ ԵվրԱզՏԸ-ին անդամակցում են` Բելառուսը, Ղազախստանը, Կիրգիզիան, Ռուսաստանը եւ Տաջիկստանը: