Պետք չէ որպես մեկ միասնություն դիտարկել Հայաստանի ու Թուրքիայի հարաբերությունների կարգավորումն ու Սփյուռքի խնդիրները: Այդ մասին Երևանում լրագրողներին է ասել «Եվրոպական ինտեգրացիա» ՀԿ-ի վերլուծաբան Մանվել Ղումաշյանը: Ըստ նրա, Սփյուռքն իր առանձին խնդիրներն ունի Թուրքիայի հետ, սակայն, դրանք պետք չէ շաղկապել Հայաստանի ու Թուրքիայի հարաբերությունների հետ: «Երբ մենք խոսում ենք Հայաստանի ու Թուրքիայի հարաբերությունների կարգավորման մասին, պետք է հասկանանք, որ նկատի ունենք Հայաստանի Հանրապետությունն ու Թուրքիայի Հանրապետությունը»,-ասել է նա՝ հավելելով, որ այդ ուղերձը պետք է հղվի նաև թուրք հանրությանը, որպեսզի այդ երկրի վարչապետն այլևս չհայտարարի, թե հայկական Սփյուռքը խանգարում է հարաբերությունների կարգավորմանը: «Մենք չպետք է համահայկական հարցերը կապենք Հայաստանի ու Թուրքիայի հարաբերությունների հետ»,-ասել է փորձագետը:
Սակայն, Ղումաշյանը նշել է, որ դա չի նշանակում, թե Հայաստանը չպետք է մասնակցի Սփյուռքի խնդիրների լուծմանը: Ըստ փորձագետի, պետությունը պետք է ուղղորդի Սփյուռքի գործունեությունը:
