Հոկտեմբերի 24-ից 30-ը Ռուսաստանի Հյուսիսային մայրաքաղաքում կկայանա «Նևսկի Բլագովեստ» քրիստոնեական կինոյի հինգերորդ բարեգործական փառատոնը, հաղորդում է Analitika.at.ua-ը: Փառատոնին կմասնակցեն Ռուս Ուղղափառ, Հռոմեա-Կաթոլիկ, Հայ Առաքելական, Ավետարանա-լյութերական եկեղեցիները, ինչպես Ինգրիայի Ավետարանա-լյութերական եկեղեցին Ռուսաստանի տարածքում:
Փառատոնի գլխավոր խնդիրն է հիմնականում փաստագրական կինոյի միջոցով հանգել համաքրիստոնեական արժեքների գիտակցմանը:
Հինգերորդ փառատոնում Հայ Առաքելական եկեղեցին կցուցադրի ֆիլմ զարմանալի ժամանակակից նկարիչ Վարուժան Եփրեմյանի մասին, որը, անցնելով աֆղանական պատերազմի սարսափների միջով, հասել է Աստծուն և իրեն գտել գեղանկարչության մեջ:
Աշխարհի տարբեր երկրներից` Ռուսաստանից, Ուկրաինայից, Հայաստանից, Լեհաստանից, Սերբիայից, Գերմանիայից, Ֆինլանդիայից, Բելոռուսիայից բերված կինոաշխատանքների փառատոնը տեղի կունենա անվճար ցուցադրությունների ձևաչափով քաղաքի մի քանի հրապարակներում: Բացի ֆիլմերից, փառատոնի շրջանակում տեղի կունենան «Դավանանքի օրեր», ցուցադրություններ, էքսկուրսիաներ:
