Անցումային ազգային խորհրդի զինված ուժերը լիովին իրենց վերահսկողության տակ են վերցրել Սիրտը, որը վերջին քաղաքն էր, որ վերահսկում էին Քադդաֆիի կողմնակիցնեևրը, հայտնում է BBC-ին:

Ըստ ականատեսների, վերջին հարձակումը, որի արդյունքում Քադդաֆիի կողմնակիցները դուրս մղվեցին քաղաքից, սկսվեց հինգշաբթի առավոտյան ու շարունակվեց 1,5 ժամ:

Սիրտի համար դաժան մարտերը գնում էին արդեն մի քանի շաբաթ:

Փետրվարի կեսին Լիբիայում սկսվեցին բողոքի ցույցերը, որոնց մասնակիցները պահանջում էին 40 տարի իշխող Մուամմար Քադդաֆիի հրաժարականը: Ցույցերը կարճ ժամանակում վերաճեցին ռազմական դիմակայության կառավարական ուժերի և ապստամբների միջև: Վեց ամսվա մարտական գործողությունների արդյունքում Քադդաֆիի վարչակարգի հակառակորդներին հաջողվեց հսկողություն սահմանել Լիբիայի գրեթե ողջ տարածքում: Ռազմական գործողություններում բեկումնային պահը վրա հասավ օգոստոսի երրորդ տասնօրյակում, երբ ընդդիմության ուժերը` ՆԱՏՕ-ի ավիացիայի աջակցությամբ, գրավեցին Լիբիայի մայրաքաղաք Տրիպոլին:

Փետրվարին ընդդիմությունը Բենղազիում ձևավորեց Լիբիայի Անցումային ազգային խորհուրդը (ԱԱԽ), որը հայտարարվել է իշխանության միակ լեգիտիմ մարմինը երկրում: ԱԱԽ-ը ճանաչել են մոտ 60 երկրներ` Ռուսաստանը ներառյալ: