Հոկտեմբերի 21-ին Վանաձորում մեկնարկում է ազատ ոճի ըմբշամարտի ավանդական միջազգային մրցաշարը, նվիրված Եվրոպայի բազմակի չեմպիոն, աշխարհի գավաթակիր և Օլիմպիական խաղերի արծաթե մրցանակակիր Ստեփան Սարգսյանը:
PanARMENIAN.Net-ի թղթակցի հետ զրույցում Հայաստանի ըմբշամարտի ֆեդերացիայի փոխնախագահ Հրանտ Ենոքյանն ասել է, որ բոլոր կազմակերպչական աշխատանքներն ավարտված են: «Արդեն Հայաստան են ժամանեկ ՖԻԼԱ-ի ներկայացուցիչներն ու ԱՄՆ-ի ազատ ոճի ըմբիշները, մյուս մասնակիցները ՌԴ-ից, Վրաստանից ու Ուկրաինայից կժամանեն հոկտեմբերի 21-ին»,-ասել է Հ.Ենոքյանը:
Ըստ Ենոքյանի, մրցաշարը շատ կարևոր է հայ ըմբիշների համար, քանի որ մինչ տարեվերջ նրանք կմասնակցեն վերջին մրցաշարին: «Աշխարհի առաջնությունից հետո մենք կտեսնենք, թե ինչ վիճակում են մեր ըմբիշները, որոնք 2012թ. պետք է մասնակցեն վարկանիշային մրցաշարերին: Անշուշտ, մենք ակնկալում ենք, որ Վանաձորում նրանք լավ կդրսևորեն իրենց»,-ասել է Ենոքյանը: