Երևանի և Փարիզի քաղաքապետեր Կարեն Կարապետյանն ու Բերտրան Դելանոեն ստորագրել են երկու մայրաքաղաքների միջև բարեկամության և համագործակցության համաձայնագիր: Ինչպես իր ելույթում նշել է Փարիզի քաղաքապետը, համագործակցությունը Երևանի հետ մեծ նշանակություն ունի ֆրանսիական մայրաքաղաքի համար: «Այս համաձայնագիրն իր մեջ ներառում է երկու քաղաքների միջև համագործակցության հետաքրքիր եզրեր: Ամենատարբեր ոլորտներում փորձի փոխանակման միջոցով համատեղ կկատարելագործենք քաղաքային տնտեսության կառավարման համակարգը»,- ասել է Բերտրան Դելանոյեն:
Կարեն Կարապետյանն իր հերթին շնորհակալություն է հայտնել Դելանոեին սրտաբաց լինելու համար` նկատելով, որ գործակցային նման մակարդակը լավ օրինակ կարող է լինել նաև Ֆրանկոֆոն այլ քաղաքների հետ հարաբերություններում, հաղորդում է Երևանի քաղաքապետարանի տեղեկատվության և հասարակայնության հետ կապերի վարչությունը:
