Հայաստանի խորհրդարանի խոսնակ Հովիկ Աբրահամյանը լրագրողների հետ զրույցում չի հաստատել Հայաստանի փոխվարչապետ, ՀՀ տարածքային կառավարման նախարարի Արմեն Գևորգյանի հրաժարականի մասին լուրերը: Ինչ վերաբերում է փոխվարչապետ Արմեն Գևորգյանի հրաժարականին և այդ պաշտոնին Երևանի նախկին քաղաքապետ Գագիկ Բեգլարյանի նշանակմանը, Աբրահամյանն ասել է, որ այդ հարցը Հայաստանի Հանրապետական կուսակցության Խորհրդի այսօրվա նիստում չի քննարկվել: Ընդ որում, նման զարգացման հնարավորության մասին հարցին նա ժպիտով նշել է, որ ոչինչ չի կարելի բացառել:
Լուրերն այն մասին, որ Գևորգյանը պատրաստվում է հրաժարական տալ, սկսեցին տարածվել այն բանից հետո, երբ հրաժարական տվեց ՀՀ Ոստիկանության պետ Ալիկ Սարգսյանը: Սակայն այդ լուրերն այսօր հերքվեցին Գևորգյանի մամլո քարտուղարի կողմից:
Նոյեմբերի 1-ին Հայաստանի Ոստիկանության պետ Ալիկ Սարգսյանը հրաժարական տվեց, ՀՀ Ոստիկանության նոր պետ նշանակվեց ՀՀ պաշտպանության փոխնախարար Վլադիմիր Գասպարյանը:
