Երևանում այսօր ներկայացվել է ԵԱՀԿ աջակցությամբ հրատարակված ոստիկանության գործողությունների, ուժի գործադրման և բանակցություններ վարելու ռազմավարության վերաբերյալ երկու ուղեցույց:
«Չափազանց կարևոր է, որ պետությունը բոլոր հնարավոր ջանքերը գործադրի` երաշխավորելու ուժի կիրառումը օրենքի սահմաններում և խիստ համաչափության մեջ»,- նշել է ԵԱՀԿ երևանյան գրասենյակի ղեկավարի պաշտոնակատար Կարել Հոֆսթրան: «Ոչ պատշաճ և անհամաչափ ուժի կիրառումը կարող է հանգեցնել ոչ միայն մարդու իրավունքների ոտնահարման, այլ նաև հանրության կողմից վստահության կորստի, որն անմիջականորեն կանդրադառնա արդյունավետ ոստիկանական ծառայություն մատուցելու կարողության վրա»:
Երկու հրատարակություններն էլ մշակվել են ԵԱՀԿ փորձագետի կողմից` Հայաստանում ոստիկանության համապարփակ բարեփոխումներին աջակցելու ԵԱՀԿ գործունեության շրջանակում:
