Հավաքական անվտանգության պայմանագրի կազմակերպության (ՀԱՊԿ) պատվիրակությունն այսօր այցելել է արտակարգ իրավիճակների նախարարություն` ՀԱՊԿ գլխավոր քարտուղարի տեղակալ Վալերի Սեմերիկովի գլխավորությամբ։
Պատվիրակությունը Հայաստան է ժամանել` նպատակ ունենալով մի շարք նախարարությունների և գերատեսչությունների հետ քննարկել և ճշգրտել մյուս տարի Հայաստանում անցկացվելիք ՀԱՊԿ օպերատիվ արձագանքման հավաքական ուժերի համալիր զորավարժության նախապատրաստման աշխատանքները։ Այդ հարցերը քննարկվել են նաև Արտակարգ իրավիճակների նախարարության ներկայացուցիչների հետ։
ԱԻՆ-ից հայտնում են, որ մեծ կարևորություն տալով համատեղ զորավարժությանը, ՀԱՊԿ ներկայացուցիչները ցանկացել են լսել հայկական կողմի կարծիքները և առաջարկները` կապված զորավարժության կազմակերպման հետ։ Քննարկվել են զորավարժության տևողության, շտաբային և պրակտիկ փուլերի բաժանման և կազմակերպչական այլ հարցեր։
ՀԱՊԿ գլխավոր քարտուղարի տեղակալը նշել է որ մյուս տարի կդիտարկվի նաև Հայաստանի Արտակարգ իրավիճակների նախարարության հետ համատեղ ուսումնավարժություն անցկացնելու հնարավորությունը։
