IBO վարկածով աշխարհի չեմպիոն Վիկ Դարչինյանի մարզիչ Վազգեն Բադալյանը PanARMENIAN.Net-ի թղթակցի հետ զրույցում նշել է, որ իր սանը ԱՄՆ-ում ջանասիրաբար մարզվում է` պատրաստվելով WBA վարկածով չեմպիոն Անսելմո Մորենոյի (Պանամա) հետ մենամարտին:

«Ցավոք, դեկտեմբերի 3-ին ես ներկա չեմ լինի մենամարտին, քանի որ ինձ վերջերս վիրահատել են: Վիկն իսկական պրոֆեսիոնալ է և Անսելմո Մորենոյի հետ մենամարտում ամեն ինչ կանի հանուն հաղթանակի»,- ասել է Բադալյանը:

Մարզչի խոսքով` Դարչինյանն արդեն ձեռք է բերել անհրաժեշտ ֆիզիկական պատրաստությունը, մնում է միայն նվազեցնել քաշը: «Վիկն իր առջև կոնկրետ նպատակ է դրել. նա ուզում է որքան հնարավոր է շատ գոտիներ նվաճել: Նա շատ նպատակասլաց է, և կարծում եմ` կհասնի իր ուզածին»,- ընդգծել է Բադալյանը:

Դարչինյան – Մորենո մենամարտը տեղի կունենա դեկտեմբերի 3-ին Կալիֆոռնիայի «Honda» կենտրոնում: