ՄԱԿ-ի գլխավոր քարտուղար Պան Գի Մունն Իսրայելին կոչ է արել դադարեցնել բնակեցման գործունեությունը օկուպացված տարածքներում և ապարգելափակել Պաղեստինի հարկային ու մաքսային եկամուտները` արաբա-իսրայելյան բանակցությունների վերսկսման պայմանների ստեղծման համար, հաղորդում է ՄԱԿ-ի մամլո ծառայությունը` ամփոփելով միջազգային կազմակերպության ղեկավարի և իսրայելյան վարչապետ Բինյամին Նետանյահուի հեռախոսազրույցի արդյունքները:
Պան Գի Մունը «խորը անհանգստություն է հայտնել Իսրայելի հայտարարած բնակավայրերի` ներառյալ Արևելյան Երուսաղեմի ընդլայնման ծրագրերի կապակցությամբ, որոնք քայքայում են ներկայիս խաղաղ պայմաններն ու խախտում միջազգային իրավունքը»: Դրա հետ մեկտեղ նա ողջունել է Իսրայելի կողմից Գազայի սեկտորում 5,5 միլիոն դոլարի նոր շինարարական նախագծերին հավանություն տալը և կոչ արել հետագայում միջոցներ ձեռնարկել այդ տարածքի շրջափակումը վերացնելու ուղղությամբ:
