Այսօրվա դրությամբ Հայաստանում արդեն 5564 մարդ հիվանդացել է գրիպով եւ շնչուղիների սուր վիրուսային վարակով: Այդ մասին «Արմինֆո» գործակալությանը տեղեկացրել են ՀՀ առողջապահության նախարարությունում: Այս պաշտոնական տվյալները բուժաշխատողները գնահատում են որպես նախահամաճարակային մակարդակ: Միեւնույն ժամանակ, նրանց խոսքերով, շատ հիվանդներ չեն դիմում բուժօգնության, եւ հիվանդների իրական թիվը շատ ավելի մեծ է, այսինքն գերազանցում է համաճարակային մակարդակը: Այդ են վկայում «շտապ օգնության» կանչերի տվյալները` միայն դեկտեմբերի 22-ին Երեւանում գրանցվել է 214 կանչ բարձր ջերմաստիճանի առնչությամբ: Հայաստանում գրիպի հետեւանքներից մահացել է մի կին, որը տառապում էր շաքարախտով, եւ գրիպը սրել էր նրա հիմնական հիվանդությունը: