Սիրիայի հասարակությունը Արաբական պետությունների լիգայի պատժամիջոցներին պատասխանում է զանգվածային ցույցերով ի պաշտպանություն Բաշար Ասադի: Ինչպես հայտնում է պետական «Սուրիա» հեռուստաալիքը, մայրաքաղաքում մարդկանց ամբոխները հավաքվել էին Սեբահատ Բահրատ կառավարական հաստատությունների համալիրի առջև, դատապարտելու համար արաբ նախարարների Կահիրեում ընդունած որոշումը: Ցուցարարները կարգախոսներ են վանկարկում ի պաշտպանություն «Սիրիայի անկախ որոշման» և կոչ են անում ձախողել թշնամիների դավադրությունը, որոնց ետևում, ըստ նրանց, կանգնած են ԱՄՆ-ն ու Իսրայելը:
ՍԱՆԱ գործակալությունը ԱՊԼ բանաձևն անվանել է «աննախադեպ քայլ միջարաբական հանրության շրջանում»: Ինչպես խոստովանում են տարածաշրջանային փորձագետներտը, ԱՊԼ պատժամիջոցները բացասաբար կանդրադառնան երկրի տնտեսության վրա՝ հաշվի առնելով, որ Սիրիայի արտահանման 52,5 տոկոսը և ներմուծման 16,4 տոկոսը բաժին է ընկնում արաբական հարևաններին: Սիրիայի խոշորագույն առևտրային գործընկերներն են Իրաքն ու Լիբանանը:
