Հնդկական օլիմպիական ասոցիացիայի նախագահի պաշտոնակատար Վիջայ Կումար Մալհոտրան հայտարարել է, որ երկիրը չի պատրաստվում բոյկոտել Լոնդոնում 2012-ին կայանալիք Օլիմպիական խաղերը:
Մի քանի օր առաջ ասոցիացիայի մի շարք նախկին և գործող անդամներ խնդրագիր ներկայացրեցին, որտեղ կոչ արեցին հնդիկ մարզիկներին Լոնդոն մեկնելուց զերծ մնալ՝ կապված նրա հետ, որ Օլիմպիադայի լոնդոնյան կազմակերպչական կոմիտեն հովանավորչական պայմանագիր է կնքել ամերիկյան Dow Chemicals քիմիական ընկերության հետ, որը նաև Union Carbide ընկերության սեփականատերն է:
1984 թ. դեկտեմբերին հնդկական Բհոպալ քաղաքի Union Carbide-ի քիմիական գործարանում տեղի է ունեցել վթար՝ 42 տոննա թունավոր գոլորշիների արտանետմամբ, որի զոհ դարձավ ավելի քան 18 000 մարդ:
«Մենք հանդիպելու ենք հաջորդ շաբաթ, սակայն ոչ խաղերը բոյկոտելու կապակցությամբ: Որոշ մարդկանց մոտ հարցեր են ծագել հովանավորչական պայմանագրի հետ կապված և մենք դա այլ հարցերի հետ մեկտեղ կքննարկենք»,- Մալհոտրայի խոսքերը փոխանցում է gazeta.ru-ն:
