Հայաստանի նվագախմբերը և անհատ կատարողները չեն ցանկանում կատարել հայ երիտասարդ կոմպոզիտորների ստեղծագործությունները, ասում են Հայ երիտասարդ կոմպոզիտորների և կատարողների միավորման անդամները: Նրանց խոսքով դրա մեղավորությունն ունի նաև Մշակույթի նախարարությունը: Նրանք նշում են, որ նույնիսկ Երևանի կոնսերվատորիայի նվագախումբն այն չի կատարում: Այն հարցին, թե փորձել են արդյոք միավորման անդամները իրենց հեղինակած ստեղծագործությունները ինտերնետի միջոցով ուղարկել արտերկիր, նվագախմբերի կամ փառատոների, նրանք տվեցին բացասական պատասխան:
Միավորումը այս տարի Վանաձորի, Գյումրու և Երևանի երաժշտական դպրոցներում կազմակերպել է մի շարք համերգներ, որտեղ կատարել են ժամանակակից և դասական հեղինակների ստեղծագործություններ: Նրանք ծրագրել են շարունակել իրենց գործունեությունը, ցանկանում են նաև համերգներ կազմակերպել Արցախում: Դեկտեմբերի 16-ին միավորումը կազմակերպել է հայ երիտասարդ կոմպոզիտորների ստեղծագործությունների համերգ «Նարեկացի» արվեստի միությունում:
