Google-ի նախագահ Էրիկ Շմիդտը իտալական թերթի հետ հարցազրույցում ասել է, որ 2012-ին Google-ը թողարկելու է Android օպերացիոն համակարգով աշխատող Nexus պլանշետային համակարգիչ և մի քանի ամսում առաջ է անցնելու Apple-ի iPad-ից։ Այս մասին գրում է Apple Insider-ը։ Google-ի՝ Apple-ի հետ մրցակցության դաշտում առաջ անցնելու առաջին փորձը Motorola Xoom պլանշետի արտադրություններ էր, որը Android 3.0 տարբերակով է աշխատում։ Սակայն Xoom պլանշետին չհաջողվեց հաղթել iPad-ին։

Շմիդտը նույն հարցազրույցում հաստատել է նաև, որ Google-ը պլանավորում է ստեղծել նաև իր սեփական ձայնային ճանաչման և կառավարման համակարգը՝ կրկին մրցակցելու Apple-ի Siri ձայնային համակարգի հետ։ Siri-ի մրցակից ստեղծելու մասին լուրը արդեն մեկ շաբաթ է, ինչ մամուլում դարձել է քննարկման թիրախ։

Նշենք, որ Android-ի վերջին տարբերակն է Android 4.0-ն՝ Ice Cream Sandwich-ը, որը հնարավոր է լինի ապագա Nexus պլանշետի օպերացիոն համակարգը։ Android Ice Cream Sandwich-ը թողարկվել է Galaxy Nexus սմարթֆոնի համար։