Դեկտեմբերի 24-ին Ալ. Սպենդիարյանի անվան օպերայի և բալետի ազգային ակադեմիական թատրոնում տեղի կունենա տոնական համերգ, նվիրված Հանրային ռադիոյի 85 և Հանրային հեռուստատեսության 55-ամյակին: Այդ մասին Երևանում կայացած մամլո ասուլիսում հայտարարել է ՀՀ Հանրային ռադիոյի տնօրեն Արմեն Ամիրյանը: Ըստ նրա, համերգը բեմականացված է մյուզիքլի տեսքով: «Բեմ դուրս կգան մոտ 160 դերասաններ, այդ թվում պարողներ, էստրադային և օպերային երգիչներ»,-ասել է Ամիրյանը:
Նա հայտնել է, որ համերգի երգացանկը կազմված է օպերային և էստրադային հիթերից, որոնք կկատարեն հայտնի երգիչներ Հայկոն, Նունե Բադալյանը, Սարգիս Աղամալյանը, Սիլվա Հակոբյանը, Զարուհի Բաբայանը, Հովհաննես Այվազյանը, Հայկ Տիգրանյանը, Գևորգ Հակոբյանը: Նրանք կկատարեն Ժակ Դուվալյանի, Առնո Բաբաջանյանի, Ջիվանու, Սայաթ-Նովայի, Սթիվի Ուանդերի, Դեմիս Ռուսոսի և այլոց ստեղծագործությունները:
