Պայթյունները Դամասկոսում ուղղված էին ռուսական հետախուզության դեմ, հաղորդում է The Guardian թերթն իր կայքում` հղում կատարելով սիրիական հեռուստատեսությանը:
Ուրբաթ օրը Դամասկոս քաղաքում երկու պայթյուն է տեղի ունեցել, որոնց արդյունքում զոհվել է 30 հոգի և տուժել են 55-ը:
Պայթյուններից հետո քաղաքում ինքնաձիգից հրաձգության ձայներ են լսվել, որոնք շուտով լռել են:
Սիրիայում վերջին 9 ամսվա ընթացքում չեն դադարում հակակառավարական բողոքները, որոնք սկսվել են մարտ ամսին:
Սիրիական ընդդիմության ներկայացուցիչների մեծ մասը և Արևմուտքի մի շարք երկրներ պահանջում են նախագահ Բաշար Ասադի հրաժարականը: Իշխանությունները մի շարք զիջումների են գնացել, սակայն ընդդիմության ղեկավարները նախկինի պես հրաժարվում են ընդառաջ գնալ իշխանությանը և խաղաղ երկխոսություն հաստատել: Նոյեմբերի 12-ին Արաբական պետությունների լիգայի անդամ երկրների ԱԳ նախարարները Դամասկոսի կողմից սիրիական ճգնաժամի կարգավորման արաբական ծրագրի դրույթները խախտելու պատճառով դադարեցրել են Սիրիայի անդամակցությունը համաարաբական կազմակերպությանը և տնտեսական ու քաղաքական պատժամիջոցներ ներմուծել պետության հանդեպ: