ՄԱԿ Գլխավոր քարտուղար Պան Գի Մունը կոչ է արել դադարեցնել արաբական տարածքների իսրայելյան օկուպացիան՝ ելույթ ունենալով արաբական աշխարհում ժողովրդավարության վերաբերյալ խորհրդաժողովում՝ Լիբանանի մայրաքաղաք Բեյրութում, հաղորդում է Ինտերֆաքսը:
«Պաղեստինյան և այլ արաբական տարածքների օկուպացիան, ինչպես և խաղաղ բնակիչների հանդեպ բռնությունը Իսրայելի կողմից պետք է ավարտվի»,- նշել է նա:
Գլխավոր քարտուղարի խոսքով՝ իսրայելյան բնակավայրերը՝ ինչպես հին, այնպես էլ նոր, անօրինական են. «Նրանք վնաս են հասցնում կենսունակ պաղեստինյան պետության ստեղծմանը»:
Ավելի վաղ Պաղեստինի ազգային վարչակազմի ղեկավար Մահմուդ Աբբասը հայտնել էր, որ չի համաձայնի Իսրայելի հետ ուղղակի բանակցությունների վերսկսմանը, քանի դեռ Արևմտյան ափին բնակավայրերի շինարարությունը դադարեցված չէ:
Իսրայելը օկուպացված պաղեստինյան տարածքներում բնակավայրերի շինարարությունն ակտիվացրել է անցյալ տարվա աշնանը՝ Մահմուդ Աբբասի կողմից Պաղեստինի անկախ պետության ճանաչման մասին հայտը ՄԱԿ ներկայացնելուց հետո: