«Բրավոն», «Սալվատինին» ու «Գառդեռոբն» իրոք ապամոնտաժվում են
Դեռևս նախորդ տարի Երևանի նախկին քաղաքապետ Կարեն Կարապետյանը, ինչպես նաև այժմյան քաղաքապետ Տարոն Մարգարյանը բազմիցս խոստացել էին, որ Աբովյան փողոցի մայթերի մեծ խանութները, ռեստորանների ու սրճարանների բացօթյա հատվածներն ապամոնտաժվելու են։ Շատերն այս հայտարարություններին վերաբերվում էին թերահավատորեն, մտածում, որ պարզապես բորբոքված կրպակատերերի «աչքին թոզ են փչում»։
Բայց արի ու տես, որ ոչ. մարդիկ իրենց խոսքի տերն են։ Դեկտեմբերին սկսվեց սրճարանների բացօթրյա հատվածների ապամոնտաժումը, իսկ այսօր արդեն հերթը հասել է այնպիսի մեծ առևտրային կետերին, ինչպիսիք են «Բրավոն», «Սալվատինին» ու «Գառդեռոբը»։ Խանութներն ապամոնտաժվում են։ Ոչ ոք չի բողոքում ու ցույց չի անում։ Շուտով Աբովյան փողոցի մայթերը կրկին կդառնան անցանելի։
