Սլովենիան բարձր է գնահատում Հայաստանի քաղաքական ջանքերը` ուղղված Հարավային Կովկասում կայունության պահպանմանը: Այդ մասին Լյուբլյանայում հայտարարել է Սլովենիայի ԱԳՆ ղեկավար Դիմիտրի Ռուպելը` Հայաստանի արտաքին գործերի նախարար Վարդան Օսկանյանի հետ հանդիպման ընթացքում: Ինչպես տեղեկացնում է ՀՀ ԱԳՆ մամուլի ծառայությունը, կողմերը նաեւ քննարկել են հարցեր, որոնք առնչվում են երկու երկրների միջեւ իրավապայմանագրային բազայի ստեղծմանը: Դ. Ռուպելը շահագրգռվածություն է հայտնել գյուղատնտեսության եւ տրանսպորտային հաղորդակցության ոլորտներում համապատասխան պայմանագրեր հնարավորինս արագ կնքելու առումով: Երկկողմ տնտեսական համագործության մասին խոսքը է գնացել նաեւ Վարդան Օսկանյանի եւ Սլովենիայի վարչապետ Անտոն Ռոպի հանդիպման ժամանակ: Մասնավորապես նշվել է բիզնես-համաժողովների անցկացման, հայ եւ սլովենացի գործարարների մասնակցությամբ տոնավաճառների անհրաժեշտությունը` ուղղված երկու երկրների միջեւ առեւտրի կարգավորմանը: