Իսրայելի նախագահ Շիմոն Պերեսը Դավոսի միջազգային համաժողովում հանդիպել է ՊԻ վարչապետ Սալամ Ֆայադի հետ: Նա զգուշավոր լավատեսություն է հայտնել պաղեստինա-իսրայելյան հակամարտության կարգավորման շանսերի վերաբերյալ:
Պերեսը նշել է, որ եվրոպացիներին հարյուրավոր տարիներ պահանջնվեց պատերազմները դադարեցնելու համար և հայտարարել է, որ մի կողմից իրավիճակը Մերձավոր Արևելքում բավական բարդ է, մյուս կողմից, խաղաղ կարգավորումը կարող է տեղի ունենալ 20 տարում, ոչ թե 100:
Ըստ Իսրայելի նախագահի, պաղեստինցիներն արդեն փաստորեն կառուցել են իրենց պետությունը և ունեն իրենց անվտանգությունն ապահովող զինված ուժեր:
Սալամ Ֆայադն իր հերթին կոչ է արել Իսրայելին որոշակիացնել իր համար ՝ ինչ է նշանակում երկու պետություն երկու ժողովրդի համար: Ըստ նրա, պաղեստինցիները ցանկանում են պետություն կառուցել 1967թ. գրավված տարածքների վրա: Նա հավելել է, որ միջազգային աջակցությունն անհրաժեշտ է հակամարտության խաղաղ կարգավորման համար:
Իր ելույթում Շիմոն Պերեսն անդրադարձավ նաև Իրանին: Նա հայտարարել է, որ հարկավոր է օգնել Իրանի քաղաքացիներին ձերբազատվել ռեժիմից:
