Այսօր Երեւանում արձանագրություն է ստորագրվել էլեկտրաէներգիայի ոլորտում հայ-ռուսական համագործակցության վերաբերյալ: Փաստաթղթի տակ իրենց ստորագրություններն են դրել Հայաստանի վարչապետ Անդրանիկ Մարգարյանը եւ ՌԱՕ «ԵԷՍ Ռոսիի»-ի ղեկավար Անատոլի Չուբայսը: Փաստաթղթում ընդգծվում է ԱՊՀ երկրների միասնական էներագհամակարգի հետ Հայաստանի էներգահամակարգի զուգահեռ աշխատանքի վերականգնման անհրաժեշտությունը: Նշվում է նաեւ Հայաստանի եւ Իրանի էներգահամակարգերի զուգահեռ աշխատանքի պահպանման եւ զարգացման եւ փոխշահավետ պայմաններով Ռուսաստանի հետ համատեղ էլեկտրաէներգիայի արտահանման անհրաժեշտության մասին: Միեւնույն ժամանակ Հայաստանի կառավարությունը եւ ՌԱՕ ԵԷՍ Ռուսիի»-ն համատեղ ջանքեր կգործադրեն Հայաստանի առանցքային էներգետիկ օբյեկտների` Հայկական ԱԷԿ-ի, Սեւան-Հրազդանի ՀԷԿ-երի կասկադի եւ Հրազդանի ՋԷԿ-ի հուսալի եւ արդյունավետ գործունեության կազմակերպման համար: Կմշակվեն նաեւ համատեղ առաջարկություններ էներգետիկ ոլորտում Հայաստանի եւ սահմանակից երկրների համագործակցության ռազմավարության վերաբերյալ: