Հայաստանում ԱՄՆ-ի առաքելությունն ունի գործունեության երեք հիմնական ուղղություն` տնտեսությունը, տարածաշրջանային ծրագրերը և ընտրությունները: Այդ մասին «Ձեռնարկատիրության զարգացում և շուկայի մրցունակության բարձրացում» նախագծի շնորհանդեսին հայտնել է Հայաստանում ԱՄՆ դեսպան Ջոն Հեֆֆերնը:
Նրա խոսքով, «Հայաստանն ու ԱՄՆ-ն լավ ներուժ ունեն առևտրային հարաբերությունների զարգացման համար»: «Ինձ հաճախ են հարցնում, թե ինչու մենք չենք ավելացնում Հայաստանի տնտեսության մեջ ուղղակի ներդրումների քանակը: Հուսով եմ` մենք կկարողանանք զարգացնել մեր հարաբերություններն այս նախագծի միջոցով»,- ընդգծել է նա:
Դեսպանը նկատել է, որ Հայաստանը ԱՄՆ-ի կարևոր գործընկերն է, և նման ծրագրերն աջակցում են երկրների միջև համագործակցության առավել ամրապնդմանը:
USAID-ը Pragma կորպորացիայի և Հայաստանի էկոնոմիկայի նախարարության հետ համատեղ կիրականացնի «Ձեռնարկատիրության զարգացում և շուկայի մրցունակության բարձրացում» նախագիծը, որն ուղղված է Հայաստանում փոքր և միջին ձեռնարկատիրության զարգացման համար լավ պայմանների ստեղծմանը, շուկայի մրցունակության բարձրացմանը, նորարարությունների խթանմանը, ինչպես նաև աշխատավոր ուժի ներուժի ամրապնդմանը:
