ՀՀ սփյուռքի նախարար Հրանուշ Հակոբյանն ընդունել է Ռուսաստանի Դաշնության «Տղամարդու առողջություն» տարածաշրջանային հասարակական կազմակերպության նախագահ, Ռուսաստանի բժշկական գիտությունների ակադեմիայի թղթակից անդամ Արմայիս Քամալովին` մի խումբ բժիշկների հետ:
Հանդիպման ընթացքում քննարկվել են ապրիլի 26-28-ը Երևանում կազմակերպվելիք «Տղամարդու առողջություն» միջազգային 8-րդ կոնգրեսի նախապատրաստական աշխատանքներին առնչվող հարցեր, ինչպես նաև սփյուռքահայ մասնագետների մասնակցության հնարավորությունը:
2003 թվականից անցկացվող միջազգային կոնգրեսի աշխատանքներին ամեն տարի մասնակցում է մինչև 1200 մասնագետ` հիմնականում ԱՊՀ անդամ պետություններից, ինչպես նաև ԱՄՆ-ից և եվրոպական երկներից:
Այս տարի Հայաստան կժամանի շուրջ 1700 մասնագետ: Կոնգրեսի շրջանակներում կազմակերպվելիք տեսական և գործնական աշխատանքները նոր խթան կհանդիսանան Հայաստանում ուրոլոգիական ծառայության զարգացման և հայ բժիշկների համախմբման առումով: Նախարարը պատրաստակամություն է հայտնել օգնել կոնգրեսի կազմակերպման աշխատանքներին և սփյուռքահայ բժիշկներ ներգրավելու առումով:
