Ապրիլի 7-ի լույս 8-ի գիշերն ադրբեջանական զինված ստորաբաժանումներն իրենց հենակետերը չեզոք գոտու խորքը տեղափոխելու փորձ են ձեռնարկել` Լեռնային Ղարաբաղի եւ Ադրբեջանի զինված ուժերի շփման գծի հարավային ուղղության վրա գտնվող Կարախանբեյլի բնակավայրի շրջանում: Ինպես «Մեդիամաքս» գործակալությանն այսօր հայտնել են ԼՂՀ պաշտպանության նախարարության մամլո ծառայությունում, ԼՂ բանակի ստորաբաժանումները համապատասխան միջոցներ են ձեռնարկել, որոնց արդյունքում հակառակորդը ստիպված է եղել նահանջել իր նախկին դիրքերը: Միջադեպի ընթացքում ղարաբաղյան ուժերի ստորաբաժանումները կորուստներ չեն կրել: ԼՂՀ պաշտպանության նախարարության մամուլի ծառայությունն ուշադրություն է դարձրել այն փաստին, որ 2000 թվականից սկսած ադրբեջանական կողմը դիմում է նման գործողությունների շփման գծի ողջ երկայնքով` փորձելով առավելագույնս մոտենալ Լեռնային Ղարաբաղի բանակի պաշտպանական բնագծերին եւ ամրապնդվել նոր դիրքերում: