Չինաստանը հանդես է գալիս Իրանի հանդեպ որևէ միակողմանի պատժամիջոցների դեմ, Պեկինում հայտնել է ՉԺՀ արտգործնախարար Յան Ցզեչին: «Անհրաժեշտ է երկխոսություն, այլ ոչ թե հակամարտություն, համագործակցության, այլ ոչ թե պատժամիջոցներ հարցի պատշաճ լուծումը որոնելու ճանապարհին, մենք դեմ ենք միակողմանի պատժամիջոցներին, և այդ դիրքորոշումն անփոփոխ է»,- ասել է ՉԺՀ ԱԳ նախարարը Ժողովրդական ներկայացուցիչների համաչինական ժողովի ամենամյա նստաշրջանի աշխատանքների շրջանակում տեղի ունեցած մամլո ասուլիսում:
Ինչպես հաղորդում է ՌԻԱ Նովոստին, Յան Ցզեչին ընդգծել է, որ Չինաստանը դեմ է, որպեսզի Մերձավոր Արևելքում որևէ երկիր, այդ թվում` Իրանը միջուկային սպառազինություն մշակի: «Դրա հետ մեկտեղ մենք գտնում ենք, որ ցանկացած երկիր իրավունք ունի համապատասխան պարտավորությունները հարգելու հիմունքներով օգտագործելու խաղաղ ատոմ»,- հավելել է նա:
