Հայաստանի իշխող Հանրապետական կուսակցությունից (ՀՀԿ) պատգամավոր Հովհաննես Սահակյանը մեկնաբանել է հայկական էստրադայի աստղ, Հայաստանի վաստակավոր արտիստուհի Շուշան Պետրոսյանի հայտարարությունն այն մասին, որ ինքը դեմ չէ խորհրդարանի պատգամավոր դառնալ, ինչպես նաև օժանդակելու է ՀՀԿ-ին: «Եթե մարդը, անկախ նրանից դա Շուշան Պետրոսյանն է կամ արվեստագետ, իսկ միգուցե այլ ոլորտից, գտնում է, որ ինքն ունի ներուժ, կարծում է, որ կարող է որպես պատգամավոր իր դրական ներդրումը կատարել մեր երկրի և ժողովրդի օրենսդրական աշխատանքի մեջ, ես ոչ մի վատ բան չեմ տեսնում դրանում»,- հայտնել է նա PanARMENIAN.Net-ի թղթակցին:
Ինչ վերաբերում է Շուշան Պետրոսյանին ՀՀԿ ընտրացուցակում ընդգրկելու հարցին, ապա Սահակյանը պատասխանել է, որ կուսակցության ցուցակն առայժմ չի քննարկվել: «Երբ (կուսակցության) Խորհուրդը որոշում ընդունի այն մասին, որ պետք է ընդգրկել նաև արվեստագետների կամ ավելացնել կանանց դերը, ապա ես դրանում ոչ մի խնդիր չեմ տեսնում»,- հավելել է նա:
