ԱՄՆ պետքարտուղար Հիլարի Քլինթոնն այսօր Սիրիայի նախագահ Բաշար Ասադին մեղադրել է անցյալ հանգստյան օրերին Սիրիայի հարցերով ՄԱԿ-ի գլխավոր քարտուղարի հատուկ ներկայացուցիչ Քոֆի Աննանի հետ հանդիպման ժամանակ նոր ռազմական հարձակումների ցինիկ կազմակերպման մեջ, գրում է BBC-ն:
«Մենք հերքում ենք Ասադի ռազմական մեքենայի գործած կանխամտածված սպանություններն ու պաշարման ժամանակ ստիպված ինքնապաշտպանության դիմած քաղաքացիական անձանց գործողությունները նույն շարքին դասելու ցանկացած փորձեր»,- հայտնել է նա ՄԱԿ-ի Անվտանգության Խորհրդի նիստում:
Սիրիայում գրեթե մեկ տարի չեն դադարում հակակառավարական բողոքները, որոնք սկսվել են մարտ ամսին:
Սիրիական ընդդիմության ներկայացուցիչների մեծ մասը և Արևմուտքի մի շարք երկրներ պահանջում են նախագահ Բաշար Ասադի հրաժարականը: Այդ պահանջն օժանդակում են ԱՄՆ-ը և ԵՄ երկրները, որոնք մի շարք տնտեսական պատժամիջոցներ են ներմուծել Դամասկոսի հանդեպ: ՄԱԿ-ի տվյալներով, Սիրիայում անկարգությունների զոհերի քանակը գերազանցել է 7,5 հազարը:
