ՌՈՒՍ ՆԱԽԱՐԱՐԸ ՏԱՐՕՐԻՆԱԿ ԽՏՐԱԿԱՆՈՒԹՅՈՒՆ Է ՑՈՒՑԱԲԵՐՈՒՄ

PanARMENIAN.Net - Երեւանից ռուս նախարարը մեկնեց Թբիլիսի: Սակայն ոչ թե պաշտոնական այցով, ինչպես նախատեսված էր վաղօրոք, այլ` զուտ աշխատանքային: Հիշեցնենք, որ հարեւան երկրի ղեկավարությունը վերանայեց այցի կարգավիճակն այն բանից հետո, երբ Սերգեյ Լավրովը հրաժարվեց ծաղկեպսակ դնել Վրաստանի ամբողջականության պաշտպանման համար զոհված զինվորների հուշահամալիրին: Մեկնաբանները ենթադրում են, որ այս դիվանագիտական դեմարշը կխոչընդոտի Մոսկվայի եւ Թբիլիսիի միջեւ վստահության մթնոլորտի ամրապնդմանը: Ի դեպ, մինչ օրս Վրաստան այցելած ռուս պաշտոնյաները չեն հրաժարվել ծաղկեպսակ դնել հուշահամալիրում, քանի որ դա են պահանջում չգրված արարողակարգի նորմերը: Նկատենք, որ Երեւան այցելող գրեթե բոլոր արտասահմանյան բարձրաստիճան պաշտոնյաները ծաղկեպսակ են դրել Օսմանյան Թուրքիայում իրականացրած ցեղասպանության զոհերի հուշահամալիրում: Դա արել են նույնիսկ այն երկրների ներկայացուցիչները, որոնք 1915թ.-ի դեպքերը չեն ճանաչում որպես ցեղասպանություն: Մասնավորապես Ղըրղստանի նախագահ Ասկար Ակաեվը չհապաղեց Ծիծեռնակաբերդ այցելել` չնայած գիտակցելով, որ խնդիրներ կունենա «Իսլամական Համագումարում» իր գործընկերներ Ադրբեջանի եւ Թուրքիայի հետ: Այդպես էլ եղավ` Անկարան եւ Բաքուն բողոքի նոտա ուղարկեցին Բիշկեքին: Սակայն արարողակարգը արարողակարգ է:

Այն, որ Սերգեյ Լավրովի գործողությունը դեմարշ էր, ոչ ոքի մոտ կասկած չի առաջացնում: Սակայն մեզ համար հատկանշական է մեկ այլ հանգամանք: Կարեւոր է ռուս նախարարի բերած փաստարկը: Նրա խոսքերով, ճիշտ չէր լինի ծաղկեպսակ դնել այն մարդկանց հիշատակին, ովքեր կռվել են Աբխազիայի եւ Օսեթիայի դեմ, քանի որ Ռուսաստանը հանդես է գալիս որպես աբխազական եւ օսեթական հակամարտությունների կարգավորման միջնորդ: «Որպես հակամարտությունների կարգավորման մեջ ներգրավված երկիր` Ռուսաստանը պետք է հաշվի առնի իր կարգավիճակը: Դժվար թե նման միջոցառումը կնպաստի կռվող կողմերի միջեւ արդյունավետ բանակցությունների համար անհրաժեշտ մթնոլորտի ձեւավորմանը»,- հայտարարել է Սերգեյ Լավրովը:

Այս փաստարկը բավականին տարօրինակ է թվում, քանի որ ընդամենը երկու շաբաթ առաջ` փետրվարի 2-ին, գտնվելով Բաքվում` Լավրովը ծաղկեպսակ դրեց «շեհիդների ծառուղում»: Այստեղ թաղված են Ադրբեջանի կողմից Ղարաբաղին պարտադրված պատերազմից զոհվածները: Եթե Թբիլիսիի հուշահամալիրում թաղված են ռազմական գործողությունների ժամանակ զոհվածները, ապա «շեհիդների ծառուղում» բացի մարտի դաշտում զոհվածներից, թաղված են նաեւ նրանք, ովքեր պատերազմից շատ առաջ սպանել էին Բաքվի խաղաղ հայերին: Ավելին, այնտեղ են թաղված նաեւ 1990թ.-ին հայերին պաշտպանելու եւ կարգուկանոն հաստատելու նպատակով Բաքու մտած ռուս զինվորներին սպանած ավազակները: Այսպիսով, «շեհիդների ծառուղում» ծաղկեպսակ դնելով` Լավրովը պղծեց ոչ միայն հարյուրավոր սպանված հայերի հիշատակը, այլեւ` իրենց զինվորական պարտքը կատարելիս զոհված իր հայրենակիցների:

Չգիտես ինչու, նախարարը մոռացել է, որ Ռուսաստանը որպես միջնորդ է հանդես գալիս նաեւ ղարաբաղյան հակամարտության կարգավորման գործում: Հայկական ծագում ունեցող ռուս դիվանագետը չի մտածել այն մասին, որ «նման միջոցառումները չեն կարող նպաստել հակամարտող կողմերի միջեւ արդյունավետ բանակցությունների համար անհրաժեշտ մթնոլորտի ձեւավորմանը»: Իսկ ամենատհաճն այն է, որ նման քայլը թույլ է տալիս այն երկրի ներկայացուցիչը, որը համարվում է Հայաստանի ռազմավարական գործընկերը:

Արտյոմ Երկանյան