«Ժողովուրդ». Անցած տարվա ձեռքբերումն, ըստ «Սևան ազգային պարկի» տնօրենի, իր տեղակալի կալանավորումն է

PanARMENIAN.Net - «Ժողովուրդ»-ը գրում է. «Վերջերս ՀՀ բնապահպանության նախարար Արամ Հարությունյանը (Բուլկի) «Սևան ազգային պարկ» ՊՈԱԿ-ի տնօրեն Աշոտ Գնդոյանից պահանջել է ներկայացնել ՊՈԱԿ-ի տարվա ձեռքբերումները: Եվ Գնդոյանի կողմից ներկայացված առաջին ձեռքբերումը եղել է այն, որ անցյալ տարի կալանավորվել է «Սևան ազգային պարկ» ՊՈԱԿ-ի պետի տեղակալ Գագիկ Մարտիրոսյանը: Այս առիթով «Ժողովուրդ»-ը Գնդոյանից հետաքրքրվել է, թե ինչու է նա Մարտիրոսյանի կալանավորումը համարում ձեռքբերում: «Դուք ումի՞ց եք լսել դա: Ախր, այ ցավդ տանեմ, հազար ու մի բան են ասում, ես ի՞նչ իմանամ: Իհարկե, տարեկան պահանջում են ձեռքբերումների ցուցակ, բայց նման բան չի եղել»,-ասել է նա: Թերթը տեղեկացնում է, որ ՊՈԱԿ-ի 2012թ. փաստացի մուտքերը կազմել են 390 մլն դրամ նախատեսված 423,5 մլն դրամի փոխարեն, այսինքն` թերակատարվել են 33,5 մլն դրամով: Իսկ այս մասով Գնդոյանը վրդովված նկատել է. «Նախատեսվածից քիչ չենք տվել, հակառակը: Դուք անկոռեկտ հարցեր եք տալիս»»: