Կառավարությունը եզդիներին օգնելու համար $100.000-ի օգնություն է փոխանցել

3 սեպտեմբերի 2014 - 11:55 AMT

PanARMENIAN.Net - ՀՀ կառավարության՝ Իրաքում ծայրահեղականների գործողությունների հետևանքով տուժած և իրենց բնակավայրերից տեղահանված եզդիներին 100.000 ԱՄՆ դոլարի չափով օգնություն տրամադրելու համապատասխան հայտագիրը ԱԳ նախարար Էդվարդ Նալբանդյանը սեպտեմբերի 2-ինհանձնել է ՄԱԿ-ի փախստականների հարցերով գերագույն հանձնակատարի (ՄԱԿԳՀ) հայաստանյան ներկայացուցիչ Քրիստոֆ Բիերվիթին։ Գումարը փոխանցվելու է ՄԱԿ-ի ՄԱԿԳՀ-ի ժնևյան կենտրոնակայանի հաշվեհամարին: Միջոցառմանը ներկա էին նաև Հայաստանում ՄԱԿ-ի մշտական համակարգող Բրեդլի Բուզետտոն, Եզդիների ազգային միության նախագահ Ազիզ Թամոյանը, Հայաստանի եզդիների հոգևոր առաջնորդ շեյխ Բրո Հասանյանը:

Վերջին շաբաթներին աշխարհի ուշադրության կենտրոնում են«Իսլամական պետություն» խմբավորմանկողմից կրոնական և ազգայինփոքրամասնությունների դեմ իրականացվող զանգվածային ոճրագործությունները։ Բռնությունների հետևանքով բնակության մշտական վայրերից տեղահանվել են հազարավոր խաղաղ բնակիչներ` եզդիներ, քրիստոնյաներ, մահմեդականներ։ Բռնությունները բազմաթիվ զոհերի պատճառ են դարձել։

Օգոստոսի 18-ին նախագահի մամուլի քարտուղար Արման Սաղաթելյանը հայտարարություն էր տարածել` նշելով, որ որևէ ազգային և կրոնական փոքրամասնության և, մասնավորապես, Իրաքի եզդիների հանդեպ բռնության կիրառումը բացարձակապես անընդունելի է, և միջազգային հանրությունը պետք է անհապաղ քայլեր ձեռնարկի դրանք ժամ առաջ դադարեցնելու, տուժածներին աջակցություն ցուցաբերելու, մարդասիրական օգնություն տրամադրելու համար:

Նախագահի կողմից հանձնարարականներ էին տրվել արտգործնախարարությանը և դիվանագիտական առաքելությունների ղեկավարներին՝ միջազգային ասպարեզում խնդրին պատշաճ մակարդակով հետամուտ լինելու իրենց ջանքերը կրկնապատկելու համար: Նախագահ Սարգսյանը օգոստոսի 18-ին վարչապետի հետ քննարկել է նաև Հայաստանի կողմից տրամադրվող մարդասիրական օգնության՝ նախապես ծրագրված ծավալները՝ 50.000 ԱՄՆ դոլարը, կրկնապատկելու հարցը, ինչին ՀՀ կառավարությունը լուծում է տվել օգոստոսի 21-ին:

Էդվարդ Նալբանդյանը նշել է, որ նախագահի հանձնարարությամբ` արտգործնախարարությունը համապատասխան քայլեր է ձեռնարկել.

«Հայաստանի ներկայացուցիչները միջազգային կազմակերպություններում բարձրաձայնել են խնդրի հրատապության և միջազգային հանրության կողմից անհապաղ քայլեր ձեռնարկելու անհրաժեշտության մասին։ Հայաստանը համահեղինակել է ՄԱԿ-ի մարդու իրավունքների խորհրդում սեպտեմբերի 1-ին ընդունված համապատասխան բանաձևը»,- նշել է նա։

Եզդիների ազգային միության նախագահ Ազիզ Թամոյանը երախտագիտություն է հայտնել Հայաստանի իշխանություններին և ժողովրդին` եզդիների մտահոգությունները կիսելու, խնդիրը միջազգային ատյաններում բարձրացնելու և եզդի ժողովրդի կողքին կանգնելու և օժանդակություն ցուցաբերելու համար։

Հայաստանում ՄԱԿ-ի մշտական համակարգող Բրեդլի Բուզետտոն իր խոսքում ողջունել է Հայաստանի մարդասիրական քայլը և համերաշխությունը` ցեղասպանության սպառնալիքի առջև հայտնված Իրաքի փոքրամասնությունների հետ։ ՄԱԿ-ի մշտական համակարգողի խոսքով, Հայաստանի մասնակցությունը ՄԱԿ-ի մարդասիրական գործունեությանն ի ցույց է դնում Հայաստանի կարևոր դերակատարությունը` որպես միջազգային հումանիտար հանրության անդամ։ Նա վստահեցրել է, որ ՄԱԿ-ն անում է հնարավորը` Իրաքում բռնություններից տուժածների հոգսը թեթևացնելու և նրանց օժանդակելու համար։

ՄԱԿ-ի փախստականների հարցերով գերագույն հանձնակատարի հայաստանյան ներկայացուցիչ Քրիստոֆ Բիերվիթը բարձր է գնահատել Իրաքի եզդիներին օժանդակելու Հայաստանի որոշումը, որը կարևոր ներդրում է` տեղահանվածներին օգնելու գործում։

Ավելի վաղ Ազիզ Թամոյանը հայտարարել էր, որ պատրաստվում են Իրաքի հյուսիսային հատվածում բնակվող եզդիների մոտ 200 ընտանիք վերաբնակեցնել Արցախում: Նրա խոսքով,Ղարաբաղի ղեկավարությունը համաձայնել է աջակցել այդ ընտանիքներին:Թամոյանը նաև նշել էր, որ Հայաստանի եզդիաբնակ տարբեր գյուղերում դրամահավաք է անցկացվում, գումարները կփոխանցվեն հատուկ հաշվեհամարի, որով էլ կկազմակերպվի այդ ընտանիքների տեղափոխումը:

«Իսլամական պետություն» խմբավորումը, որը մինչև վերջերս կոչվում էր «Իրաքի և Լևանտի իսլամական պետություն» (ISIS), իրաքյան սունիների ապստամբ խմբերի գլխամասային կազմակերպությունն է, որը ստեղծվել է 2006-ի հոկտեմբերի 15-ին: Խմբավորումը իշխանության հավակնություններ ունի 18 իրաքյան գավառից 8-ում, որտեղի բնակչությունը հիմնականում սունիներ են: Կազմակերպության ստեղծմանը մասնակցել է «Ալ Քայիդան» և նրա հետ կապված «Շուրա մոջահեդների խորհուրդը»: Գլխավոր նպատական է օկուպանտների և նրանց դաշնակիցների արտաքսումը և իսլամական շարիաթական պետության ստեղծումը Իրաքի սունիների գավառներում: 2010-ի մարտին ավիահարվածի արդյունքում ոչնչացվեցին խմբավորման երկու առաջնորդները՝ Աբու Օմար ալ Բաղդադին և եգիպտացի Աբու Այուբ ալ Մասրին: Նոր առաջնորդ դարձավ մարոկացի Ան Նասեր Լիդինիլ Աբու Սուլեյմանը:

Հղումներ թեմայով.

Public Radio of Armenia. Armenia provides $100 000 in aid to Iraqi Yazidis