Վերջին օրերին ՀՀ ֆոնդային բորսայում դրամըդոլարի նկատմամբարժեզրկում է:Նախորդ շաբաթ $1 փակման գինը 411,5 դրամ էր, երեկ՝ նոյեմբերի 4-ին, այն արդեն 412,75 դրամ էր, գրում է «Հայկական ժամանակ»-ը: Դրամի հետագա թուլացումը սպասելի է, քանի որ արտարժույթի հոսքը ՀՀ նվազում է, հավելում է թերթը:

Միևնույն ժամանակ մոսկովյան բորսայի սակարկությունների մեկնարկին եվրոյի փոխարժեքը նոյեմբերի 5-ին աճել է 1,66 ռուբլով, հասնելով նոր առավելագույն ցուցանիշի՝ 56,16 ռուբլու: Դոլարի փոխարժեքը ռուբլու համեմատ Մոսկովյան բորսայում աճել է 1,38 ռուբլով՝ հասնելով 44,98 ռուբլու, հայտնում է ՏԱՍՍ-ը:

Ռուբլին առաջին անգամ իջել է մեկ դոլարի դիմաց 44 ռուբլու շեմից: Կտրուկ անկման հետևանքով ամերիկյան արժույթի փոխարժեքը կազմում էր 45 ռուբլի:

Երկարժույթային զամբյուղի (բաղկացած 0,45 եվրոյից և 0,55 դոլարից) արժեքը այսօրվա սակարկությունների մեկնարկին Մոսկովյան բորսայում ավելացել է 1,47 ռուբլիով երեկվա փակման մակարդակի համեմատ՝ հասնելով 49,93 ռուբլու: Ռուսական արժույթի արժեքի վրա բացասաբար են ազդում շատ գործոններ, այդ թվում նավթի գնանկումը, մի քանի տարի շարունակվող կապիտալի արտահոսքը Ռուսաստանից, հակառուսական պատժամիջոցները, որոնք հարված հասցրեցին ռուսական տնտեսությանը և դժվարացրին արտաքին փոխառությունները ռուսական ընկերությունների համար:

Ռուբլու անկումը սկսվեց 2014-ի ամռանը: Հոկտեմբերի 6-ին դոլարն առաջին անգամ գերազանցեց 40 ռուբլու շեմը, 43 ռուբլու նախորդ «հոգեբանական» նիշը դոլարն առաջին անգամ պատմության մեջ հաղթահարեց հոկտեմբերի 29-ին: Ֆինանսների նախարարության գնահատականով, էներգակիրների գնանկումն ու արևմտյան պատժամիջոցների հանրագումարը կկազմի ՌԴ ՀՆԱ 4 տոկոսը, որից 2 տոկոսը բաժին է ընկնում պատժամիջոցներին: Ընդհանուր առմամբ ԱՄՀ գնահատականների համաձայն, 2014-ին ակնկալվում է ռուսական տնտեսության աճ ընդամենը 0,2 տոկոսով: 2015-ին աճը կարող է կազմել 0,5 տոկոս:

Ռուբլու փոխարժեքի նվազումը ու խնդիրները ռուսական տնտեսության մեջ բացասական միտումներ են առաջացնում նաև Հայաստանի տնտեսության համար, որը մասնավորապես մեծ կախվածություն ունի դրամական փոխանցումներից Ռուսաստանից: Բարդությունները ՌԴ տնտեսության մեջ առաջին հերթին անդրադառնում են դրամական փոխանցումների քանակի վրա, որոնք սեպտեմբերին 2013-ի սեպտեմբերի համեմատ նվազել են 8,7 տոկոսով՝ 153,3 մլն դոլար նախորդ տարվա 167,7մլն դոլարի դիմաց: Անկման միտումը շարունակվում է արդեն երրորդ ամիսը՝ 2014-ի հուլիսին ստացվել է մոտ 169 մլն դոլար՝ նախորդ տարվա հուլիսի համեմատ անկումը կազմել է 6,6 տոկոս: Իսկ օգոստոսին Ռուսաստանից փոխանցվել է 161 մլն դոլար, անկումը մեկ ամսում կազմել է 4,2 տոկոս նախորդ տարվա օգոստոսի 7 տոկոսի համեմատ: