Մոսկվայում կրկին անսարք ավտոբուս է կանգնեցվել, որով Երևան էր մեկնելու 50 մարդ

Մոսկվայում կրկին անսարք ավտոբուս է կանգնեցվել, որով Երևան էր մեկնելու 50 մարդ

PanARMENIAN.Net - ՌԴ Պետավտոհսկողության Մոսկվայի վարչությունը և «Փոխադրումների կազմակերպիչ» պետական հաստատությունը կասեցրել են Մոսկվա-Երևան ապօրինի ավտոբուսի մեկնումը:

Ինչպես ասվում է հաստատության կայքում, «Վագտրանս» ՍՊԸ ապօրինի փոխադրողի ավտոբուսը, որը նոյեմբերի 4-ին տեղափոխվել էր հատուկ կայանատեղի, և որով 50 ուղևոր պետք է մեկներ Երևան, կանգնեցվել է շաբաթվա մեջ երկրորդ անգամ:

Այժմ պարզվում են հանգամանքները` թե ինչպես կարող էր ավտոբուսը առանց խախտումները վերացնելու դուրս գալ տուգանային հրապարակից: Նոյեմբերի 4-ին Մոսկվայի պետավտոտեսչության աշխատակիցները թույլ չէին տվել մեկնել Երևան ուղևորվող ավտոբուսներին, որոնք լուրջ անսարքություններ ունեն: Տուգանքը, որը նշանակվել էր, չի մուծվել: Բացի այդ, վարորդը մեկնումից առաջ չի ստուգել ուղևորների փաստաթղթերը, այդպիսով վտանգելով քաղաքացիների կյանքն ու գույքը: Ուղևորների ուղեբեռը ևս չի ստուգվել:

Գերատեսչությունում նշել են, որ հայկական «Վագտրանս» ՍՊԸ-ն ընդգրկված չէ ՌԴ տրանսպորտի նախարարության միջազգային ավտոբուսային չվերթների ցանկում: Դա նշանակում է, որ փոխադրողը իրավունք չունի աշխատելու Ռուսաստանում, սակայն շարունակում է ապօրինաբար ուղևորների փոխադրումը Մոսկվա-Երևան-Մոսկվա երթուղով: Հաճախորդներին գտնում են համացանցում գովազդի միջոցով: Ուղևորությունները կազմակերպվում են ցանկացողների անհրաժեշտ քանակի համալրվելուն պես:

Այժմ «Վագտրանս» ՍՊԸ-ի ավտոբուսը կրկին տուգանային հրապարակում է: Ընկերությանը մինչև 150 հազար ռուբլի տուգանք է սպառնում:

«Փոխադրումների կազմակերպիչ» պետական հաստատությունը իր հաղորդագրության մեջ նշել է, որ բոլոր ավտոբուսային ընկերությունները, որոնք ուղևորություն են առաջարկում դեպի Երևան, ապօրինի են աշխատում:

Ավելի վաղ հայտնի դարձավ, որ Մոսկվայի պետավտոտեսչության աշխատակիցները թույլ չեն տվել մեկնել Երևան ուղևորվող ավտոբուսներին, որոնք արգելակների և ղեկի հետ կապված լուրջ անսարքություններ ունեն, այդ մասին հայտնել էր ՌԴ ՆԳՆ Մոսկվայի գլխավոր վարչության պետ Անդրեյ Գալիակբերովը:

«Հատուկ կանխարգելիչ միջոցառումների արդյունքում հաջողվել է հայտնաբերել Երևան մեկնող 2 ուղևորատար ավտոբուս, որոնց տեխնիկական զննության ժամանակ լուրջ անսարքություններ են հայտնաբերվել արգելակների և ղեկի համակարգում, նաև ավտոբուսների գործարանային կառուցվածքի փոփոխություններ»,-ասել է Գալիակբերովը: Պարզվել է, որ վարորդներն իրականացրել են ուղևորափոխադրումներն առանց համապատասխան արտոնագրի և անվտանգության կանոնների կոպիտ խախտումներով, հավելել է ՆԳՆ ներկայացուցիչը:

Նոյեմբերի 3-ին տեղի ունեցած Մոսկվայից Երևան ուղևորվով ավտոբուսի կողաշրջման հետևանքով զոհվել է 9, վիրավորվել՝ 48 ուղևոր: Բոլոր զոհերն ու վիրավորները ՀՀ քաղաքացիներ են: ՃՏՊ պատճառները դեռ պարզվում են: Հիմնական վարկածներից մեկը տեխնիկական անսարքությունն է, դիտարկվում է նաև մարդկային գործոնի վարկածը: Հայտնի է, որ 44-ամյա վարորդը 2015-ի ամռանը վարչական պատասխանատվության է ենթարկվել անսարք ավտոբուս վարելու համար: ՌԴ Ուզլովսկի շրջանային դատարանը որոշում է կայացրել Տուլայի մերձակայքում վթարված Մոսկվա-Երևան ավտոբուսի վարորդին կալանավորել երկու ամսով:

Հայաստանի Հանրապետության 44-ամյա քաղաքացու նկատմամբ հարուցվել է քրգործ ՌԴ Քրեական օրենսգրքի 234-րդ հոդվածի (Երկու և ավելի մարդկանց մահվան հանգեցրած երթևեկության և մեքենաների շահագործման կանոնների խախտում) հոդվածով:

 Ուշագրավ
«Կանգնած ենք սարի պես, մինչև վերջ կանգնելու ենք»,- ասել է նա
Ըստ քաղխորհրդի՝ Արցախի միջազգային ճանաչումը և բնակչության ինքնորոշումը հակամարտության միակ մշտական լուծումն են
Ցույցի մասնակիցները պատրաստվում են շարժվել Եվրապարլամենտ
ՄԻԵԴ-ը բացառել է ադրբեջանցի սպա Ռամիլ Սաֆարովի գործով վճռի վերանայման հնարավորությունը