Կ.Զատուլին. Արդեն վաղուց մշակվել է ղարաբաղյան լուծման փաթեթը, որը նախատեսում է ԼՂՀ ճանաչումն ու յոթ շրջանների վերադարձը

PanARMENIAN.Net - «Հայաստանի եւ Ռուսաստանի նախագահներ Սերժ Սարգսյանի եւ Դմիտրի Մեդվեդեւի նախավերջին հանդիպումից հետո իրադրությունը Կովկասում որակապես փոխվել է, եւ մենք այժմ գործ ունենք նոր տարածաշրջանի հետ: Ռուսաստանը ներկայումս համարում է, որ տարածաշրջանում գոյություն ունի 5 պետություն, որոնցից մեկի` Վրաստանի հետ նրա հարաբերությունները ընդհատված են»,- այսօր տեղի ունեցած Երեւան-Մոսկվա հեռուստակամուրջի ժամանակ հայտնել է ՌԴ Պետական Դումայի ԱՊՀ գործերի եւ հայրենակիցների հետ կապերի գծով հանձնաժողովի նախագահի առաջին տեղակալ, ԱՊՀ երկրների Ինստիտուտի տնօրեն Կոնստանտին Զատուլինը: Նրա խոսքերով, անխոս, հարց է ծագում` ինչպե՞ս իրեն կդրսեւորի ԼՂՀ-ն:



«Իհարկե, մենք պատկերացնում ենք, որ վերջին ժամանակներս Հայաստանի իշխանությունների նախաձեռնությամբ զսպվել են Հարավային Օսիայի եւ Աբխազիայի հետ Ղարաբաղի համագործակցության քայլերը: Բայց դրա հետեւում կանգնած էր հայկական կողմի այն հույսը, որ կհաջողվի այդ հակամարտությունը լուծել Երեւանի համար բարենպաստ տարբերակով»,- նշել է Զատուլինը եւ ավելացրել, որ Ռուսաստանի համար ծայրահեղ անշահավետ է, որպեսզի Հայաստանին եւ Ադրբեջանին չհաջողվի մեղմացնել կամ լուծել ղարաբաղյան հիմնախնդիրը, եւ որ ինչ-որ մեկի կողմից նախաձեռնվեն Վրաստանի իրադարձություններին համարժեք գործողություններ:



«Հարկ է նշել, որ Հարավային Օսիայի պատերազմի միջոցին իրադրության սրվածություն է նկատվել Ադրբեջանի եւ Ղարաբաղի ԶՈՒ շոշափման գծում: Արդեն վաղուց մշակվել է ղարաբաղյան լուծման փաթեթը, որը նախատեսում է ԼՂՀ ճանաչումն ու յոթ շրջանների վերադարձը»,- ընդգծել է ԱՊՀ երկրների Ինստիտուտի տնօրենը: Նրա խոսքերով, ՌԴ նախագահի` Երեւան կատարած այցից առաջ եւ հետո բազում հայտարարություններ են արվել այն մասին, որ բարձր մակարդակով խոսքը գնում է որոշակի ժամանակով սառեցված ղարաբաղյան հիմնախնդրի կարգավորման հստակ տարբերակների մասին:



«Անհրաժեշտ է տարածաշրջանում բացառել ցանկացած կարգի բռնությունը, երրորդ երկրների միջամտությունը, որոնք ինչ-որ պատճառներով կցանկանան աղ լցնել դեռ թարմ վերքերի վրա»,- նշել է Կոնստանտին Զատուլինը