Բադասյանն Արցախում բոլոր ուժերին համախմբվելու կոչ է արել

PanARMENIAN.Net - Արցախի Ազգային ժողովի նախկին պատգամավոր, ազատամարտիկ, «Միացյալ Հայաստան» կուսակցության ղեկավար Վահան Բադասյանը ֆեյսբուքյան իր էջում Արցախում բոլոր ուժերի համախմբման կոչով է հանդես եկել։

«Հայոց պետականությունը ներկայումս կանգնած է լրջագույն մարտահրավերների առջև։ Վտանգված են Հայաստանի սահմանները՝ Արցախը, Սյունիքը, Վայոց Ձորը, Գեղարքունւքը, Տավուշը։ Այս օրհասական պահին ժամանակի հրամայականն է Արցախում միավորել, համախմբել բոլոր ուժերը՝ անկախ քաղաքական հայացքներից և կուսակցական պատկանելիությունից ու պայքարել մեր ժողովրդին հուզող ու ապագայի նկատմամբ հավատ ներշնչող անվտանգային և տնտեսական խնդիրների լուծման համար»,-ասվում է հայտարարության մեջ։

Նա հավելել է, որ վերոնշյալ խնդիրների լուծման վերաբերյալ «Միացյալ Հայաստան» կուսակցության առաջարկները ներկայացվել են ԱՀ նախագահ Արայիկ Հարությունյանին, ինչն ընդունվել է նրա կողմից։

«Մենք պատրաստակամ ենք ստանձնելու մեր բաժին պատասխանատվությունը, որպեսզի ապահովվի արցախաբնակ հայության անվտանգությունը, պաշտպանունակությունը, տնտեսական ապահովումն ու զարգացումը»,-ասվում է հայտարարության մեջ։

Հունվարի 28-ին «Եռաբլուրում» արած հայտարարություններից հետո Բադասյանը բերման է ենթարկվել` նա ասել էր, թե վարչապետ Նիկոլ Փաշինյանին պետք է հեռացնել ոչ միայն որպես պարտության սիմվոլի, այլ նաև թշնամու: Նրա խոսքով՝ «թշնամուն պետք է հեռացնել՝ ընդուպ մինչև զենքի միջոցով»։ Դրանից հետո նա բերման էր ենթարկվել ԱԱԾ, ավելի ուշ՝ կալանովրվել։ Բադասյանը մեղադրվում է ՔՕ 301 հոդվածով՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը։ Բադասյանի նկատմամբ ընտրված խափանման միջոց կալանավորումն ավելի ուշ այլ խափանամն միջոցով՝ չհեռանալու մասին ստորագրությամբ փոխարինվեց։

Բադասյանը «Մարտական խաչի» ասպետ է: