Իրավապաշտպան Ռուբեն Մելիքյանը, անդրադառնալով պրոդյուսեր Արմեն Գրիգորյանին ներկայացված մեղադրանքին, նկատել է, որ վարչապետ Նիկոլ Փաշինյանի կողմնակիցներն ամեն օր հայերի մի մասին, մասնավորապես՝ արցախահայությանը, վերջին խոսքով նվաստացնում են, բայց որևէ քրեական գործ չի հարուցվել։

Ըստ ԱԱԾ-ի՝ ազգային արժանապատվությունը հրապարակայնորեն նվաստացնելու դեպքի առթիվ հարուցված քրգործի շրջանակներում Արմեն Գրիգորյանը ՀՀ քրեական օրենսգրքի 226-րդ հոդվածի 2-րդ մասով նախատեսված հանցանք կատարելու համար ձերբակալվել է, քննիչի կողմից միջնորդություն է ներկայացվել դատարան` նրա նկատմամբ կալանավորումը որպես խափանման միջոց կիրառելու համար: Նշվում է, որ հրապարակվել են «Հայելի» ակումբում և այլ տեղերում Արմեն Գրիգորյանի հարցազրույցները, որոնց ժամանակ վերջինս «հրապարակայնորեն նվաստացրել է Շիրակի և Արարատյան դաշտավայրերի բնակչության ազգային արժանապատվությունը և մտացածին գաղափարներով կասկածի տակ դրել նրանց էթնիկ ծագումնաբանությունը»:

Մայիսի 17-ի ուշ երեկոյան Մելիքյանը ֆեյսբուքյան ուղիղ եթերում Աջափնյակի դատարանի մոտից, որտեղ կայանալու էր Գրիգորյանի կալանավորման հարցով դատական նիստը, ասել է, որ գուցե Գրիգորյանը որոշ էքսցենտրիկ ձևակերպումներ կարող է թույլ տված լինել, բայց խոսքի համար քրգործ հարուցել, ձերբակալել, հետո էլ շտապել կալանավորվել, տրամաբանության մեջ չի տեղավորվում։

«Արմեն Գրիգորյանը հղի կնոջը մեքենայի տակ չի գցել-սպանել, հայրենիք չի հանձնել, 5000 մարդու գլուխ չի կերել։ Նա մեղադրվում է դաշտավայրի բնակիչներ ազգային արժանապատվությունը նսեմացնելու համար․․․ Նիկոլ Փաշինյանի կողմնակիցներն ամեն օր հայերի մի մասին, մասնավորապես՝ արցախահայությանը, վերջին խոսքով նվաստացնում են, էդ ո՞նց եղավ, որ որևէ քրեական գործ չհարուցվեց այդ կապակցությամբ, բայց հարուցվեց այս գործը»,-ասել է Մելիքյանը։

Պրոդյուսեր Արմեն Գրիգորյանի կալանավորման հարցով դատական նիստը հետաձգվել է և տեղի կունենա մայիսի 18-ին։