Ռուսաստանցի քաղաքագետ Սերգեյ Մարկեդոնովը հայտարարել է, որ Մոսկվան կորցրել է «հայ-ադրբեջանական հակամարտության կարգավորման գլխավոր մոդերատորի դերը»։ Այդ մասին նա գրել է ֆեսյբուքյան իր էջում՝ նշելով, որ ցավով է դա ասում։

«Սակայն, չտեսնել ակնհայտն ու վիճել իրականության հետ, լավագույն ելքը չէ։ Մոտ մեկ տարվա ընթացքում (2021-ի նոյեմբերի 26-ի ՀՀ, ՌԴ և Ադրբեջանի երրորդ եռակողմ հայտարարությունից հետո) Ռուսաստանը կորցրել է գլխավոր մոդերատորի դերը»,-գրել է նա՝ հավելելով, որ Պրահայի քառակողմ հանդիպումն ամրագրել է այն, ինչ սկսվել էր Բրյուսելում 2021-ի դեկտեմբերին, գրում է «Նովոստի-Արմենիան»։

«Այս տանգոյում ուղորդողը ԵՄ-ն է, դուրեկան է դա, թե ոչ։ Իսկ ԱՄՆ-ն 100 տոկոսով սատարում է այդ գծին, իսկ Մոսկվան ուշացնում էր իր նախաձեռնությունները։ Արդյունքում, որպես դիսկուրս լռությունն էր, ուշացումն ու «լալկան հայրենասիրությունը»,-նշել է քաղաքագետը։

Մարկեդոնովը նշել է, որ ՀՀ վարչապետ Նիկոլ Փաշինյանն ակտիվորեն թեքվեց դեպի Արևմուտք միայն այն բանից հետո, երբ Մոսկվան, փաստացի, դադարեց արձագանքել Ղարաբաղի շուրջ և հայ-ադրբեջանական սահմանին տեղի ունեցողին։

«Ոչ ոք չի ասում, որ պետք էր երկրորդ ճակատ բացել Կովկասում, բայց անել 4-րդ, 5-րդ համատեղ հայտարարությունները, ակտիվացնել դիվանագիտության և միջնորդության բոլոր մակարդակները, և գլխավորը, հրապարակավ գործել, ոչ թե կիսագաղտնի խորհրդակցություններում, պետք էր»,-նշել է Մարկեդոնովը։

Եվրոպական քաղաքական համայնքի գագաթնաժողովի շրջանակում Պրահայում հոկտեմբերի 6-ին տեղի է ունեցել ՀՀ վարչապետ Նիկոլ Փաշինյանի, Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի քառակողմ հանդիպումը, որի արդյունքում հայտարարություն է ընդունվել, որով կողմերը հաստատել են հանձնառությունը, որ ճանաչում են միմյանց տարածքային ամբողջականությունն ու ինքնիշխանությունը և համաձայնություն են տվել ԵՄ քաղաքացիական առաքելության տեղակայմանը ՀՀ-Ադրբեջան սահմանին, որի առավելագույն ժամկետը 2 ամիս է։ ‌