Փաշինյան․ Գերիների վերադարձի համար ամերնօրյա աշխատանք է տարվում

Փաշինյան․ Գերիների վերադարձի համար ամերնօրյա աշխատանք է տարվում

PanARMENIAN.Net - Վարչապետ Նիկոլ Փաշինյանն ԱԺ–ում հարցուպատասխանի ժամանակ, անդրադառնալով գերիների վերադարձին, ընդգծել է, որ այդ ուղղությամբ ամենօրյա աշխատանք է տարվում՝ առանց մանրամասնելու։

Պատասխանելով «Հայաստան» խմբակցության ղեկավար Սեյրան Օհանյանի հարցին, թե որն է Արցախի հարցում ՀՀ ռազմավարությունը՝ վարչապետն ասել է, որ կառավարության ռազմավարական անելիքն է Հայաստանի պետականությունը, ինքնիշխանությունը և անկախությունն ամրապնդելը և շարունակելու են այս ճանապարհով գնալ, գրում է «Փաստինֆոն»։

Անդրադառնալով այն դիտարկումներին, թե իշխանությունը Ղարաբաղի հանդեպ անտարբեր մնաց, որ Ղարաբաղին ինչ-որ իրավիճակում մենակ են թողել՝ Փաշինյանն ասել է, որ նման գնահատականներին մի բառով կարող է գնահատական տալ. երախտամոռություն։

Նա հավելել է, որ ուրիշ բառ պարզապես չի կարող օգտագործել, ընդ որում՝ սա վերաբերում է բոլոր այն դեպքերին, երբ խոսքը գնում է կառավարության մասին կամ խոսվում է ընդհանրապես ՀՀ մասին։

«Իմ եզրակացությունն այն է, որ որոշ ուժերի կողմից երկար տարիներ ԼՂ հարցն օգտագործվել է մեկ նպատակի համար, որպեսզի Հայաստանում պետություն չկայանա։ Այդ համոզմունքն ինձ համար գնալով ավելի է խորանում։ Ըստ էության՝ 1996 թ-ի Լիսաբոնի գագաթնաժողովից հետո ԼՂ հարց չի եղել և մենք չենք առերեսվել այդ իրականության հետ։ Սա նաև մեր խորքային խնդիրներից մեկն է»,- ասել է Փաշինյանը։

«Ինքնորոշում» եզրույթին անդրադառնալով՝ նա ընդգծել է, որ ուզում է հիշեցնել Լիսաբոնի գագաթնաժողովի փաստաթուղթը, հայտարարությունը, որտեղ ասվում է, որ ԼՂ հիմնախնդիրը պետք է լուծվի ինքնորոշման իրավունքի շրջանակներում, այն է՝ ԼՂ-ն պետք է ինքնավարություն ստանա Ադրբեջանի կազմում։

«Միշտ չէ, որ մեր օգտագործած տերմինները համադրել ու համեմատել ենք դրանք ստեղծած կառույցների և մարմինների ընկալումների և մեկնաբանությունների հետ»,–ասել է նա։

Նա ընդգծել է, որ որպես ՀՀ վարչապետ՝ իր խնդիրը Հայաստանի Հանրապետության ապագան է։

«Իմ լիազորությունների շրջանակում ՀՀ սահմանադրությունը ինձ տալիս է պատասխանատվություն ՀՀ ապագայի վերաբերյալ և ես կենտրոնացած եմ այդ խնդրի վրա։

Ադրբեջանը սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Արդյունքում մեկ օր անց՝ սեպտեմբերի 20-ին ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ՝ համաձայնվելով Բաքվի պայմաններին՝ ՊԲ զինաթափում և Արցախի Հանրապետության լուծարում։ Սեպտեմբերի 24-ից արցախցիների բռնի տեղահանում է սկսվել, 100,000–ից ավելի մարդ է բռնի տեղահանվել Հայաստան: Ըստ որոշ տվյալների, Արցախում մոտ 40 հայ է մնացել։ Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի մեջ է մտնում 2024–ի հունվարի 1–ից։

 Ուշագրավ
Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը
Դեսպանը նաև հրապարակել է Politico-ի հոդվածը «Thales» ընկերության ֆրանսիական ռադարների մասին
Այն ենթադրում է տարբեր տեսակի աջակցություններ պետություններին՝ տեխնիկական, ոչ մահաբեր զինատեսակների տրամադրում
---