Գիրք նվիրելու օրը՝ Երևանի կոնյակի գործարանում

Գիրք նվիրելու օրը՝ Երևանի կոնյակի գործարանում

PanARMENIAN.Net - Ավանդույթի համաձայն՝ փետրվարի 19-ին Երևանի կոնյակի գործարանում նշվել է Գիրք նվիրելու օրը։

Տարեցտարի հաղորդելով տոնին նոր ձևաչափ՝ այս տարի Երևանի կոնյակի գործարանը Newmag հրատարակչության հետ օրվա խորհրդին ընդառաջ կազմակերպել է գրական մրցույթ, որին կարող էր մասնակցել ընկերության յուրաքանչյուր աշխատակից։

Մրցույթի արդյունքներն ամփոփվել են փետրվարի 19-ին Երևանի կոնյակի գործարանի ARARAT թանգարանում, որտեղ և կայացել է մրցանակների հանձնման արարողությունը։

Գրական մրցույթում մրցանակային տեղեր են զբաղեցրել Անահիտ Գասպարյանը, Հասմիկ Եգանյանը, Սվետլանա Համբարձումյանը, Մադլենա Խաչատրյանը, Մանվել Թումանյանը, Նելլի Ղազարյանը, Սերգեյ Ղալթախչյանը, Ալեքսանդր Դավթյանը՝ գրանցելով բացառիկ արդյունքներ։

15 հարցից բաղկացած մրցույթ-խաղն ամփոփում էր տարբեր երկրների հեղինակների և տարբեր ժամանակաշրջանների գրական գործեր ու դրանց դրսևորումն արվեստի այլ ճյուղերում։ Մրցույթի բովանդակային շեշտերից մեկը, անշուշտ, Հայաստանն էր՝ իր պատմությամբ և մշակույթով։ Հարցերից մի քանիսը անդրադառնում էին աշխարհահռչակ տարբեր գրողների հիշատակումներին Հայաստանի մասին։

«Որևէ երևույթ չի կարող վերածվել ավանդույթի, եթե չլինի հանրային ջերմ ընկալում։ Իսկ ավանդույթը դարձնում են արժեք այն մարդիկ, ովքեր կիսում և հետևում են նրա գաղափարներին։ Ուրախ եմ, որ Երևանի կոնյակի գործարանում «Գիրք նվիրելու օր» տոնելը դարձել է միմյանց հետ ջերմ պահեր կիսելու ևս մեկ ավանդույթ։ Տպավորիչ Է թիմի մասնակցության եռանդը և ցուցաբերած արդյունքը»,- նշել է Երևանի կոնյակի գործարանի գործադիր տնօրեն Սերգեյ Խաչատրյանը։

«Շատ ուրախ ենք, որ Երևանի կոնյակի գործարանը «Գիրք նվիրելու օրը» տոնում է ոչ թե սոսկ գիրք նվիրելով, այլ ամեն տարի ստեղծարար մոտեցում է ցուցաբերում։ Այս տարվա շեշտադրումը կարդացածի քննական մոտեցումն էր և բովանդակությունը։ Եվ հաճելիորեն զարմացած ենք և՛ մասնակցության ակտիվությունից, և՛ մրցանակային տեղեր զբաղեցրածների գիտելիքի խորությունից»,- նկատել է Newmag hրատարակչության ղեկավար Արտակ Ալեքսանյանը։

 Ուշագրավ
Փեյնի հեղինակած 8 լիամետրաժ ֆիլմերն առաջադրվել են ընդհանուր թվով 24 Օսկարի
Տիգրան Ավինյանն ու Գրեգորի Դուսեն այցելել են պատմական թաղամաս
Snap-ը պլատինե երգի կարգավիճակ է ստացել նաև մի քանի այլ երկրներում
Հայկական դուդուկի երաժշտությունը ՅՈՒՆԵՍԿՕ-ի ցանկում է ընդգրկվել դեռևս 2008 թ․
---