Մխիթարյան․ Ազգային հավաքականի դուռն ինձ համար փակ է՝ ավելի լավ է ավարտել մեկ քայլ շուտ

PanARMENIAN.Net - Հայաստանի ազգային հավաքականի նախկին ավագ Հենրիխ Մխիթարյանը Newmag / summerfest-2024-ի շրջանակում պատասխանելով հարցին, թե արդյո՞ք Հայաստանի ազգային հավաքականի էջը համարում է եզարափկված, ասել է, որ հավաքականի դուռն իր համար փակ է։

«Այն, ինչ ունի սկիզբ, ունի նաև ավարտ։ Ավելի լավ է ավարտել մեկ քայլ շուտ, քան՝ երկու քայլ ուշ: Ավելի լավ է այդ որոշումը կայացնես դու, քան՝ ուրիշները: Այս պարագայում կարող եմ ասել՝ իմ ցանկացած որոշում, որը կայացրել եմ իմ ֆուտբոլային կարիերայի ընթացքում, թե դրանից դուրս, ոչ մի բանի համար չեմ զղջում»,–ասել է նա, գրում է Panorama.am-ը։

Նա նշել է, որ գոհ է իր կայացրած որոշումներից, գոհ է իր անցած ճանապարհից:

«Որոշ մարդիկ հնարավոր է ասեն՝ կարող էր ավելի լավ կամ ավելի վատ կարիերա ունենալ, բայց, կարծում եմ, ոչ մեկս մեր ճակատագրից չենք կարող փախչել ոչ աջ, ոչ ձախ: Պետք է համակերպվենք նրա հետ, ինչ ունենք և շնորհակալ լինենք Աստծուն այն ամենի համար, ինչ նա մեզ տվել է: Միանշանակ ասեմ, որ, ցավոք սրտի, ինձ համար հավաքականի դուռը փակ է»,- ասել է Մխիթարյանը:

Ապրիլին կիսապաշտպան Հենրիխ Մխիթարյանն «Ինտերի» կազմում առաջին անգամ իր կարիերայում դարձել է թոփ 5 լիգաները ներկայացնող առաջնության չեմպիոն։ Մինչ միլանյան ակումբը, հայ ֆուտբոլիստը թոփ 5 լիգաների շրջանակում հանդես է եկել իտալական «Ռոմայում», անգլիական «Արսենալում» ու «Մանչեսթեր Յունայթեդում», գերմանական «Բորուսիա Դորտմունդում»։