Փոքր Վեդիի մանկապարտեզի ձերբակալված դաստիարակն ազատ է արձակվել` խափանման միջոցի հիմքեր չկան

PanARMENIAN.Net - Փոքր Վեդիի մանկապարտեզում սանի նկատմամբ բռնություն գործադրելու դեպքով ձերբակալված դաստիարակն ազատ է արձակվել։ Այդ մասին հայտնել է ՆԳՆ խոսնակ Նարեկ Սարգսյանը, տեղեկացնում է Factor.am-ը։

«Ձերբակալման 72 ժամը լրացել է, և նրա նկատմամբ խափանման միջոց ընտրելու հիմքեր չեն եղել»,- նշել է նա:

Ավելի վաղ ՔԿ խոսնակը տեղեկացրել էր,որ Փոքր Վեդիի «Զարթոնք» մանկապարտեզում երեխային ծեծի ենթարկած դաստիարակին մեղադրանք է առաջադրվել ՀՀ քրեական օրենսգրքի 196-րդ հոդվածի 2-րդ մասի 3-րդ կետով, այն է՝ անչափահասին ուժեղ ցավ կամ ֆիզիկական ուժեղ տառապանք պատճառելը։ ՔԿ խոսնակը նաև փոխանցել էր, որ երեխայի մայրը ճանաչվել է տուժողի օրինական ներկայացուցիչ, նա և տնօրենը հարցաքննվել են։

«Մանկապարտեզում այլ նմանատիպ դեպքի վերաբերյալ այս պահի դրությամբ քննությամբ դեռևս տվյալներ չեն ստացվել, սակայն այդ ուղությամբ քննություն իրականացվում է, նոր հանգամանքներ ի հայտ գալու դեպքում քրեադատավարական կարգով համապատասխան ընթացք կապահովվի»,- ասել էր Գոռ Աբրահամյանը։

Համացանցում տեսանյութ էր տարածվել, որում երևում էր, թե ինչպես է Փոքր Վեդի համայնքի մանկապարտեզի դաստիարակը քնելու ժամին ծեծում երեխային։